DVG a bolbe aumenta capacidad di test pa haya mas caso di COVID-19 mas rapido posibel. Tin 39 caso extra!

ORANJESTAD - Di 56 caso positivo activo actual na Aruba, 49 ta transmision local. Asina Departamento di Salud (DVG) a anuncia diaranson mainta. Despues cu 2 dia tras di otro a registra 5 caso positivo di covid-19 na Aruba. Un bez mas ta escala e capacidad di test pa logra gara mas tanto caso posibel cu por ta positivo. For di 234 test haci ta keda registra 39 caso aserca hibando e cantidad di casonan positivo activo na 56 di cual 49 ta transmision cu a tuma lugar localmente.

Loke cu ta resalta entre esnan positivo ta cu mayoria ta bou e edad di 39 aña, dus personanan den nos comunidad cu ta hopi activo.

Mirando e cantidad di casonan cu ta keda registra y premirando cu e cifras lo sigui subi, ta urgi comunidad pa atene nan mes na tur regla y medida ya stipula. E medidanan y reglanan ta conoci caba for di inicio di e pandemia y ta cuestion di cuminsa aplicanan bek estriktamente.

Segun DVG, Aruba a stop e transmision di covid-19 na un ocacion caba y hunto cu responsabilidad y disiplina nos por contene e transmision un bez mas.

E medidanan ta;

Si bo ta malo y tin sintoma, keda cas y yama bo dokter di cas of 280.0101

Si bo no por tin 1.5 meter di un otro persona uza un mondmasker

Laba man frecuentemente cu awa y habon of husa handsanitizer

Evita mishi cu wowo, nanishi y boca

No bay unda tin aglomeracion di hende ni tampoco aglomera.

Sigui e recomendacionan cu ta wordo duna pa bo por proteha bo mes y bo sernan stima na cas. Bo salud ta bo responsabilidad cuid’e.