Hulanda a aproba di dos fianza pa Aruba pa yuda dunador di trabou

ORANJESTAD – Hulanda (RMR) a aproba un di dos fianza ‘suave’ pa Aruba diabierna di AWG 49.5 miyon florin. Asina prome minister Evelyn Wever a bisa durante un briefing extraordinario diabierna mainta relaciona cu e crisis di COVID 19. Esaki ta pa gobierno usa pa luna di mei, pa yuda e dunado di trabou cubri salario di su trahadonan y mantene nan asina na trabou. E fianza aki no tin interes riba dje y tin cu wordo paga bek aki dos aña, estilo bulletlening. E condicionan ta igual na esun anterior. Pa loke ta condiciona specifico, manera reduccion di gasto specifico etc, no tabata 'ter sprake' awe diabierna, segun e prome mandatario a contesta noticiacla.com. 

YUDA

E intencion ta pa cu e suma aki, yuda e doño di trabou paga parti of full e salario of gran parti di dje di e trahado. Si e doño di trabou y e trahado yega na un acuerdo mutuo, e suma aki por wordo paga hopi lihe, segun Wever.