Wever: No ta mustra cu scol na Aruba lo habri pa 11 di mei

ORANJESTAD – No ta mustra cu scolnan na Aruba lo habri bek despues di dia 11 di mei proximo, aunke a anuncia anteriormente cu scol lo a keda cera te e fecha ey y cu lo habrie despues di esey, evaluando e situacion. Asina prome minister Evelyn Wever a bisa durante e briefing di diahuebs anochi riba coronavirus. Loke si ta sigui, ta e klasnan cu tin cu pasa nan examen escolar cuminsando for di otro siman caba. Pa nan tin areglonan special haci y nan ta informa caba. Pero apertura di scolnan regular no ta cla ainda. Segun Wever, esaki pasobra no por garantisa ainda cu tur cos ta cla pa sigura e salud di esnan cu ta bay scol. 

SKOA y SIMAR

For di director di SKOA Anuesca Baly, noticiacla.com a compronde cu no a tende nada mas di minister di Enseñansa y cu si no tende algo contrario, scol ta poni pa cuminsa dia 11 di mei proximo, manera e mandatario a menciona den su conferencia di prensa. For di sindicato di maestro SIMAR, tambe e portal aki a compronde cu nan no ta kere cu ta prudente pa habri scol pa 11 di mei, debi cu no tin siguransa pa salud di tanto docente como alumnonan.