Wever: Hulanda lo manda personal medico bek pa Merca

ORANJESTAD – Hulanda ta manda henter e ekipo medico cu a bin Aruba y Corsou e siman aki, bek nan destinacion. Asina prome minister di Aruba Evelyn Wever Croes a bisa diabierna anochi durante e briefing riba coronavirus. Esaki debi cu un di e personanan na Corsou a test positivo pa coronavirus. Y pa evita problema, a opta pa manda henter e ekipo bek. A informa tambe cu e grupo aki lo biaha e fin di siman aki mes bek. Bisando esey mesora, Wever a sigura cu no tin peliger pa Aruba no obstante e loke a pasa na Corsou (un di e personanan a bin Corsou contagia cu coronavirus). E gruponan a yega Aruba y Corsou un dia prome, cu e intencion di keda pa 90 dia. Esaki awor ta cambia. A confirma cu pa otro siman mes un grupo nobo lo yega Aruba y Corsou pa e ayudo.