Grupo di 21 intensivista a yega Aruba pa reforza ICU na HOH

ORANJESTAD – Un grupo di 21 intensivista Mericano (E prome di total 35) a yega Aruba diahuebs merdia, pa por asisti durante 90 dia cu e trabounan den ICU. Nan gastonan ta wordo cubri pa gobierno Hulandes. Pa 7 dia largo nan lo ta den isolacion, y despues por cuminsa traha regularmente. Esaki segun noticiacla.com a wordo informa diaranson, ta e asina yama HCWP (Health Care Worker Protocol) cu Horacio Oduber Hospital (HOH) ta usa como regla internacional. Si en caso mester di nan despues di 7 dia lo por uzanan despues di testnan y uza tur medida di precaucion segun DVG a bisa e portal aki. E motibo cu tin e cantidad aki, ta cuadra cu e cantidad di cama cu Hulanda a manda recientemente pa Aruba (12 cama), completo cu su ekiponan necesario. Pa e expansion aki, mester di mas personal pa por ekipa y maneha esaki tambe. Y na Aruba no tin suficiente personal pa e extra camanan aki. Mientras cu no mester di nan, lo entrena e personal actual y yuda pa releva esnan cu ta trahando incansablemente pa varios siman caba. E grupo aki ta parti di un grupo cu a keda encarga y contrata pa Hulanda pa asisti Aruba, Bonaire y Corsou. Cada un di e islanan aki a haya nan respectivo cantidad di cama, remedi y mas asistencia.