Di 5 pashent di coronavirus hospitalisa, 3 ta den ICU ainda

ORANJESTAD – E cantidad di persona hospitalisa pa coronavirus na Aruba a baha di 9 pa 5. Asina prome minister di Aruba Evelyn Wever Croes a bisa durante e briefing di dialuna anochi. Di e 5 pashent, 3 ta keda den ICU (cuido intensivo) y 2 ta den sala regular. Di e grupo total, 4 ta hende homber y 1 ta hende muher. Y e edad ta varia entre 43 y 79 aña. Pa loke ta nan estado di salud, hefe di departamento di malesa contagioso (DBZ), Sharline Koolman no por a bay den datos personal, pero a bisa cu docternan ta keda bisa cu nan situacion (sigur esnan den ICU) ta ‘stabil’. Kico esey kier men exactamente, no por bisa tampoco.