Retiro di 300 coordinador ta crea discusion politico

ORANJESTAD – E retiro anuncia e siman aki di 300 coordinador di e ex gabinete Mike Eman II (segun un comunicado di gobierno actual), a crea e discusion politico necesario e fin di siman aki. E coordinadornan en cuestion a ricibi nan respectivo carta e siman aki, cu ta informa nan cu nan ultimo salario ta januari 2018. Segun prome minister Evelyn Wever, a haye obliga di tuma e paso ey ‘pasobra gobierno di AVP a purba hinca tur den aparato gubernamental como ambtenaar’, siendo cu nan tabata den periodo cu e gobierno tabata demisionario.

EMAN

Ex prome mandatario a bringa bek mesora, acusando e gabinete actual di ‘ripiticion di historia’ unda cu atrobe ta bin cu ‘retiro masal’ y ta ‘practica persecucion politico’. Segun Eman, e gobierno no ta siña y mientras ta papia di tin e ‘hende central’, ta laga centenares di persona sin trabou despues di dianan di fiesta. Ademas, segun Eman ora cu nan a tuma mando 8 aña pasa, nan a opta pa no practica e ‘persecusion politico’, y a tene e personanan di partido contrario toch na trabou, aunke tabatin contractonan cu no tabata cuadra. Algo cu segun Eman, e gabinete Wever Croes no a haci. Wever a reacciona bisando cu ‘ ta Mike Eman mes a perhudica su hendenan door di no regla nan papelnan na tempo’.