Gomez: Departamento di Impuesto a kita beslag riba InselAir Aruba

ORANJESTAD – InselAir Aruba a haya poco noticia positivo den su direccion, cu ta dun'e rosea mesora pa sigui opera den e temponan dificil aki. Esaki ta ora cu departamento di impuesto (DIMP) a kita e beslag riba e cuentanan di banco di InselAir Aruba diahuebs atardi. “Mi por confirma cu e beslag ariba e cuentanan di banco di InselAir a wordo kita a consecuencia di e palabracionnan cu a wordo haci entre DIMP y e accionistanan di InselAir” directora di DIMP Luenne Gomez Pieters a confirma den un primicia pa NoticiaCla.com. “A cumpli cu e palabracion nan haci y lo mester cumpli cu e debernan di Impuesto mensual” Gomez a sigui bisa. E directora a splica tambe cu esaki tambe ta duna InselAir espacio pa reanuda nan operacion nan y tambe por paga e trahador nan di InselAir Aruba. “InselAir tambe a wordo poni na altura” Gomez a sigui bisa e portal aki.

E BESLAG

Tabata dos siman pasa diabierna (17 di februari) cu DIMP a laga pone beslag riba e cuentanan bancario di e compania aereo. Despues tabata InselAir cu a culpa DIMP cu e avionnan tabata geground pa motibo di e beslag legging. Algo cu mesora directora di DIMP a desmenti, prome na NoticiaCla.com. Despues siman pasa tabatin programa pa tin findishi di mobilario di e compania, pero a para esey un dia prome. E beslag na banco si a keda vigente, pero finalmente awe esey a wordo kita. E findishi ta keda posponi y lo por wordo reanuda momento cu Insel Air no cumpli.