No ta culpa di belastingdienst cu avionnan di InselAir ta na tera

ORANJESTAD - No ta berdad cu ta pasobra departamento di impuesto (DIMP) a pone beslag riba e avionnan di InselAir Aruba, cu a ground e avionnan. Directora di DIMP Luenne Gomez-Pieters a desmenti e informacion di InselAir diahuebs merdia pa NoticiaCla.com. E aeroliña un dia prome a saca un comunicado unda cu ta e.o. ta alega esey.  E trayecto di grounding di avion ta un otro trayecto, di cual departamento di aviacion civil ta responsabel. Den e otro trayecto, tin belastingdienst cu ta unda cu a pone beslag pa incumplimento di pagonan necesario. "No ta e falta di belastingdienst cu e avionnan ta grounded" Gomez a bisa enfaticamente.

PLAN DI RESCATE

Gomez a confirma cu tabatin un reunion diaranson entre ministernan di Finanza y di Transporte, InselAir y belastingdienst pa discuti posibilidadnan cu tin pa cu findishi di inboedel di e aeroliña, tur planea pa mayan diabierna. "InselAir ta wardando pa reanuda nan operacion na Aruba pasobra nan avionnan ta grounded, pa asina nan por genera placa pa por sigui cumpli cu tur otro creditor. Depende di e plan y su contenido, si belastingdienst ta kita e beslag. "Mi ta wardando confirmacion di Corsou di e hendennan cu ta bezig cu e plan di rescate pa dicidi kico ta pasa". 

INSELAIR TA CULPA DIMP

"No ta nos competencia pa bay bisa cu un avion mester keda tera pasobra e no ta cumpli cu normanan stipula di aviacion" Gomez a bisa. Esey ta departamento di aviacion civil su trabou y competencia. E beslaglegging di DIMP si ta keda vigente pa 'garantisa (nos) vordering cu ta cana pa tur cliente mescos. "Ora cu tin incumplimento di belasting tin proceso di cobransa di invordering cu ta cana su caminda pa tur hende" Gomez a sigui bisa. Mes momento a clarifica cu no ta intencion di belastingdienst pa cera ningun negoshi, pa bende cosnan di cliente sin un proceso. "Pero si ta den intencion di InselAir pa sali afo y duna nan cooperacion pa por logra y cumpli cu direccion di aviacion y tambe cu departamento di impuesto. 

FINDISHI TA SIGUI?

E findishi ta programa pa tuma lugar diabierna y otro siman diamars y diaranson. A prepara enberdad tur cos pa e findishi tuma lugar. Pero si e plan di InselAir ta ok, por dicidi cu no ta sigui cu e findishi. "Si InselAir por cumpli cu e palabracionan haci laat ayera tardi, nos ta para e findishi y e ta un proceso normal cu ta sigui tambe cu cualkier otro cliente". Ora cu papia di plan di rescate, no ta asina cu ta un suma so mester pone riba mesa pa evita findishi, sino un plan di pago tambe mester acompañe, a largo plazo. E suma cu ta wordo menciona ta entre 2.2 miyon y 5 miyon. Pero Gomez no kier a menciona e suma pasobra ta trata di casonan individual di cliente. "Nunca belastingdienst por sali bisa tal y tal hende debe tanto cen" Gomez a bisa. Por a bisa solamente cu ta un suma substancial. 

MATERIAL DEN BESLAG TA CUBRI DEBE?

Tin beslag poni riba cuentanan na banco y riba propiedad (inventario). Semper ora cu pone beslag, ta duna espacio pa ora cu ta paga salario di trahado, cu belastingdienst semper ta coopera pa 'release' lo minimo cu compania mester tin pa sigui draai. "No ta intencion di belastingdienst pa pone beslag y cera un compania y no duna espacio pa por yega na sanea e situacion cu nan ta aden" Gomez a sigui bisa.