Oduber: Comunicado di AHATA yena cu mentira flagrante

ORANJESTAD - Un mentira flagrante ta loke minister di turismo Otmar Oduber a considera  contenido di e comunicado(nan) di AHATA emiti diadomingo anochi. Entre nan, e critica cu 'minister ta mete demasiado den ATA'. "E minister no ta mete at all den e aspecto di mercadeo" Oduber ta cuminsa na refuta. Loke si ta berdad, segun Oduber, ta cu e maneho di e minister ta wordo sigui. "Pero pa loke ta alocacion di fondonan, mi tin cu bisa cu den e parti di mercadeo, e minister no tin ningun involvimento sino ta djies pone e liña cora di loke ta maneho di gobierno" Oduber a sigui bisa. E contenido di e comunicado ultimo di AHATA, Oduber ta considera mas bien como un excusa pa defende e 'e acto iresponsabel cu nan ta haciendo aworaki'. Aki e mandatario ta referi na e participacion (of falta di esaki) di AHATA den board di ATA. 

AHATA TA CUESTIONA ROL DI MIEMBRO DI DIRECTIVA

E rol di AHATA su miembronan den e directiva ta wordo cuestiona pa AHATA den e comunicado. Oduber a confirma cu den un carta cu el a ricibi di abogado Brown (di AHATA), el a ricibi preguntanan cu el a haya hopi straño. "Sinembargo nos a contesta esakinan" e mandatario a sigura e portal aki. E mandatario ta mustra mas aleu cu e no ta compronde ningun di e preguntanan cu e abogado a haci, pasobra segun e mandatario, den tur asunto e directiva tabata forma parti di desicionan y cambionan cu a tuma lugar. "Tur cambio cu a tuma lugar den ATA, tur sin excepcion a wordo aproba door di e hunta di comisario, incluyendo e miembronan di AHATA". E mandatario como tal a manda tur e notulen di ATA y comunicacion, caminda e CEO di AHATA (Jim Hepple) tabata den e reunion, unda cu a aproba proposicion di AHATA tambe. 

METEMENTO DI MINISTER DEN FONDO

E hecho cu minister ta mete den e fondonan, y cu AHATA tin un rol limita, tambe Oduber a refuta. "Minister pa ley no por haci esaki" Oduber a sigura e portal aki. "Al contrario, e minister den articulo 1 di e propio ley aki ta esun cu ta zet uit e liña cora pa loke ta maneho y e invulling ta tuma lugar na nivel di ATA y su board cu ta esun cu ta aproba e presupuesto, e business plan, y ta mand'e pa minister pa e drumi na parlamento pa 10 dia". E cambionan cu AHATA ta referi na dje, ta cosnan cu a tuma lugar 3 aña pasa, y tur e cambionan a wordo hancra den e jaarrekening, aproba di tur 7 miembro di e directiva. 

FONDO NO CORECTAMENTE ALOCA

E hecho cu AHATA ta culpa ATA di no ta uza e fondonan corecto y ta uza nan pa proyecto local en bes di uz'e den exterior, riba sugerencia di minister, tambe ta un di e mentiranan cu AHATA kier plama segun Oduber. "Ningun fondo cu tabata aloca pa mercadeo, no a wordo uza pa e producto (Aruba). Semper a keda den cuadro di loke e presupuesto mester ta, nunca a uza esaki pa mercadeo. Berdad tabatin 'underspending' esta gasta menos cu a presupuesta, pero esaki tambe a wordo aproba pa entre otro Jim Hepple. "Esey no tabatin nada di haber cu ningun instruccion cu ningun maneho di gobierno. Simplemente operacion di ATA" Oduber a sigura NoticiaCla.com.