AHATA na ATA: Inverti placa afo en bes di cosnan local caro

ORANJESTAD - En bes di uza placa aloca riba presupuesto di ATA pa e.o. promove Aruba den exterior, ATA ta opta pa sea uza esaki den activicadnan local caro, of no por gasta e placa y ta manda esaki bek. Asina AHATA ta declara den un comunicado como reaccion riba e relacion entre AHATA y ATA. Segun AHATA, e minister di turismo a expresa su preocupacion pa cu AHATA su falta di participacion den preparacion di e presupuesto di aña 2017 di Aruba Tourism Authority. AHATA a mustra sinembargo cu nan tin tur intencion pa participa na e proceso aki, aunke historia recien ta sugeri cu su aporte lo tin un balor limita como cu e direccion mas amplio di e alocacion di fondonan pa wordo gasta pa ATA, ta bin di e Minister y cu, na mesun momento, aparentemente ATA mes no ta capaz di por gasta e fondonan aloca manera nan ta aloca.

BREAKDOWN DI PLACA USA Y NO USA

AHATA ta sigui na duna un splicacion detaya di e loke cu ATA no por a gasta. Segun AHATA, na aña 2014 ATA no a logra uza Afl. 18.3 miyon di su entrada y e siguiente aña no a logra uza un otro Afl. 17.1 miyon di su entrada. Na 2014 a manda Afl. 10.7 miyon bek pa Gobierno y na 2015 a manda Afl. 15.9 miyon bek pa Gobierno. Den forma consistente, segun AHATA, ATA no ta logra inverti fondonan aloca y a uza Afl. 5.3 miyon di menos den e presupuesto di aña 2014 y 11.2 miyon menos den e presupuesto di 2015, a pesar cu nan ta bon consciente di e retonan serio den mercadeo cu tabata necesario pa atende. 

INVERSION DEN PROYECTONAN LOCAL CARO 

Na 2014 e inversion den mercadeo tabata 20% menos cu e inversion haci na 2013, ora cu a conoce e “piek” di Afl. 56.9 miyon y na 2015 e inversion tabata 16% menos cu e total di 2013, como cu placa a wordo desvia pa uzo den proyectonan local caro, a pesar cu supuestamente ATA principalmente mester ta dedica na mercadeo den exterior!