AHATA lo participa den ATA aunke minister ta mete mucho

ORANJESTAD - A pesar di metemento pisa di minister di turismo, AHATA tin tur intencion di participa den e presupuesto di ATA, aunke ultimo añanan su rol ta masha limita. Asina e gremio hotelero a reacciona diadomingo den un comunicado despues di algun siman di silencio riba e tema. Tabata siman pasa ainda cu NoticiaCla.com a trece e punto aki dilanti 3 siman despues cu AHATA a retira su miembronan di directiva di ATA. 

PETICION DI MINISTER

Den nan comunicado, AHATA ta mustra cu despues cu tres miembro di e Hunta di Supervicion di ATA a tuma nan retiro riba diaranson di 22 di juni, AHATA a ricibi un peticion for di minister di turismo riba diahuebs 23 di juni pa nomina seis candidato for di cual tres mester wordo selecta pa minister di turismo pa keda apunta pa funciona den e Board di ATA. AHATA a contesta riba diabierna 24 di juni cu nan lo cuminsa busca e candidatonan aki. 

CONTESTA DI AHATA

Como contesta, e gremio ta mustra cu riba dia 1 di juli, nan a dirigi un carta na e minister cu un serie di pregunta cu ta regarda e rol y funcion di e candidatonan como cu nan tabatin dificultad pa identifica individuonan cualifica cu tabata dispuesto pa forma parti di e board. E minister a contesta e carta ey riba 13 di juli y AHATA awo lo traha un lista di seis candidato cu a cualifica, kende ta prepara pa forma parti di e Board di ATA y lo manda e lista aki pa e Minister.