Aeropuerto ta sigura cu a haci bon trabou den caso di turista deteni

ORANJESTAD - Gerencia di aeropuerto di Aruba ta sigura cu a haci bon trabou den caso di turista deteni, y cu recientemente a wordo laga den libertad. "Aruba Airport Authority N.V. (AAA) a tuma nota di un decision di corte recien tocante un incidente cu a tuma lugar na aeropuerto dia 21 di maart 2016" nan ta raporta den un comunicado awe mainta. "Aunke cu AAA ta reconoce y respeta e decision di corte, nos ta desapunta con e caso a wordo publica".

BON TRABOU 

AAA su Team di Seguridad a haci bon trabou di intercepta un arma cu tabata den un maleta. E staff di Seguridad a haci loke cu nan mester haci, cu ta pa sigura cu niun articulo prohibi subi abordo di un avion.

ORGUYOSO DI E TRABOU

AAA ta orguyoso di e trabou eherci door di su ekipo y lo sigui apoya iniciativanan cu ta yuda aumenta seguridad na Aeropuerto Internacional Reina Beatrix.

E MOTIVACION DI HUEZ

Manera ta conoci, NoticiaCla.com recientemente a raporta e motivacion recien di e caso di e hecho cu e turista Anderson a wordo declara liber recientemente di posesion ilegal di arma. Aki a mustra cu ta debi na entre otro fayonan detecta na aeropuerto. Asina hues ta motiva su sentencia, cual motivacion a wordo manda diaranson pa prensa. Fayonan manera 'e oficial di seguridad a mishi cu e arma', y 'e camera di cu ta move constantemente enbes ta poni fiho', ta entre algun punto cu hues ta mustra cu a yuda e defensa di e turista cu mientrastanto ya ta na Merca caba. 

DETENCION DI E TURISTA

Manera ta conoci, y manera cu NoticiaCla.com a raporta anteriormente, dia 8 di juli ultimo e dama turista cu tabata cera pa 4 luna pa posesion ilegal di arma a recobra su libertad. Ora cu e dama a biaha bek pa Merca despues di su vacacion, seguridad di aeropuerto a tuma nota di un revolver den su maleta di man. Basa riba esey, el a keda deteni pa 4 luna. 

DEFENSA DI E TURISTA 

E dama durante curso di su detencion, pa medio di su abogado a desmenti constantemente cu e arma ta di dje y cu e lo tin conocemento di esaki. Asina e splicacion di corte ta cuminsa na bisa den su motivacion. Segun e turista, e no tabatin ningun motibo pa drenta cu un arma trafica, mientras cu bo sa cu bo lo wordo gara na e control di seguridad ora di rontgen. Ademas no tin sentido pa transporta un arma pa Arkansas, unda eynan ta hopi facil pa haya uno y den forma legal. 

SERIEDAD DI E CASO

Hues sinembargo a mustra si cu e pertenencia di un arma den un maleta di un sospecho ta un indicacion serio cu e lo tabatin e arma delanta. Di otro banda, no por a haya un motivacion pakico e dama lo kier a transporta un arma. Den caso di traficacion di droga, esaki si ta un otro asunto pasobra aki tin placa ta hunga un rol. 

FAYO DEN SEGURIDAD DI AEROPUERTO

Unda cu segun corte, seguridad di aeropuerto a faya den fabor di e turista, ta e hecho cu e imagennan di e video di camera di seguridad ta move constantemente (pa cubri henter e area), cu ta pone cu e no por determina si durante un di e movecionnan di e camera, un otro hende por a deposita e arma eynan sin cu e camara (movibel) a gara esaki. No por a haya nada di registro di e arma na Merca of otro caminda. Y finalmente e ultimo fayo constata, ta cu ora cu e agente di seguridad a descubri e arma, el a coy e arma cu su man. Esey a elimina cualkier chens pa proba cu fingerprint di e turista ta riba e arma of no, of si tin mas prueba fingerprint di un di tercer persona. Basa riba e informacionan ey, hues ta pensa cu esaki tur a yuda den e defensa di e turista cu tabata sospechoso y cu a conduci na su libertad.