Turista Mericano bek na Merca despues di tabata deteni 4 luna na Aruba

PINE BLUFF - Despues di tabata encarcela 4 luna na Aruba na KIA, e turista Mericano Andronette Anderson di Pine Bluff Arkansas a recobra su libertad y bolbe Merca. Tabata na maart ultimo ora cu despues di a celebra su cumpleaños na Aruba hunto cu su prima, e ex maestra a keda deteni na aeropuerto pasobra autoridad Mericano a haya un arma di candela den su ekipahe di man. El a para riba cu e no ta di dje, pero esey no a yuda. Despues di 4 luna su caso a bin dilanti y el a wordo declara inocente y a bolbe Merca. 

PUBLICIDAD PA SU CASO

For di momento cu el a keda deteni, Anderson su caso a haya atencion na Merca ora cu corant y television di su estado y condado a raporta riba su detencion y encarcelacion y awor su liberacion. Cada pasa luna tabatin un update di su caso. Finalmente Anderson a recobra su libertad y ta bek na Merca. Contrario na otro casonan di detencion unda cu prensa y e persona en cuestion tabata papia malo di Aruba, esaki no tabata e caso e biaha aki. "Nan a trat'e bon, y el a haya tur atencion necesario" su famia a bisa durante un conferencia di prensa dialuna. 

"Nos ta kere cu ta door di resamento, e por a bolbe cas sano y salvo" pastor Amelio Howard di Grace Temple Church a bisa. Anderson tabata toca orgel tur diadomingo na e misa ey. 

"E ta ok. Nan no a maltrate (den prison na Aruba). El a recobra su libertad y awor kier reanuda su bida normal".