ATV canal 15 ta muda pa otro localidad e siman aki

ORANJESTAD - ATV canal 15 ta muda pa otro localidad e siman aki. Esaki debi cu pa orden di corte nan mester a sali for di e edificio den cual nan ta aden, Royal Plaza,  mas tarda e siman aki. Esey a pone cu e canal mester a haci cambionan drastico pa por continua cu e canal. Y despues di hopi trabou, a logra cu e canal lo haya un otro localidad dentro di poco. Diaranson anochi e canal pa medio di un comunicado a confirma cu 'despues di casi 20 aña transmitiendo for di su studio situa den Royal Plaza Mall, e canal di television ATV ta cla pa muda pa un otro localidad'. 

CAMBIO DI MUNDO DI TELEVISION

Desde su inicio e mundo di television a cambia drasticamente y televidentenan tabatin mas motibo pa mira television atrobe, no solamente pa noticia, pero tambe pa entretenimento, informacion y programanan educativo.  

NOTICIA AWENOCHI TEMPORALMENTE FOR DI AIRE

Esey lo haci cu temporalmente, ta spera cu lo ta pa mas cortico, lo no por transmiti e noticiero, “Noticia Awenochi”. Ta pidi televidentenan pa ta pendiente pa pronto anuncia e apertura di su studio nobo situa na un otro localidad.  

ULTIMO PRESENTACION DIAHUEBS

Segun a canal, diahuebs 30 di juni 2016 lo bira e ultimo presentacion di e noticia y e programa regular di e stacion di television for di Royal Plaza Mall.

HISTORIA DI ATV

ATV a cuminsa cu su transmisionnan oficial dia 30 di september 1996 y desde e tempo ey a sa di haci un cambio grandi den television riba nos isla. Na varios ocasion, pa hopi aña consecutivo ATV a gana premio como television di aña y specialmente presentando e noticia cu mas sintonia nacional. ATV ta conoci pa su caranan cu diariamente ta presenta e noticianan mas importante di dia. Caranan di experiencia y cu na un forma profesional ta tene televidentenan bon informa.