Corte: ATV tin dos siman pa sali for di Royal Plaza

ORANJESTAD - E compania ABC Aruba Broadcasting Company NV (ABC), cu ta opera como e canal di television ATV (canal 15), a haya 2 siman di tempo pa bandona e edificio unda cu nan ta aworaki na Royal Plaza. Asina corte a dicta den un sentencia siman pasa diaranson. E disputa ta e suma di placa cu e canal di television debe Royal Plaza, y cu ta uno cuantioso. E suma ta wordo disputa pa e doño di e edificio (Royal Plaza NV) cu e no a wordo paga, of no paga completo. Como tal for di aña pasa october, Royal Plaza a kibra e contracto di huur cu e compania. 

SENTENCIA

Den e sentencia di siman pasa, hues a 'ontbind' e contracto osea disolve e contract entrante 6 di october 2015, y cu ABC mester sali di e espacio cu e ta huur di Royal Plaza dentro di dos siman cu deurwaarder presenta e veredicto na ABC. Ademas corte a ordena cu ABC tin cu paga un suma miyonario (cuenta habri) y ademas un suma specifico pa cada luna cu ABC a huur e localidad despues di 1 di october 2015, plus interes pa e suma pendiente desde 1 di october 2015.  

SITUACION PRECARIO

Fuentenan na e compania a confirma na NoticiaCla.com cu enberdad nan tin dos siman ainda pa cumpli cu e sentencia, y cu e situacion enberdad ta precario. Mes momento ta mustra si cu ta trahando duro pa remedia e situacion y evita un 'salida'. E situacion di e canal ultimo tempo no ta mucho positivo, mirando cu e problema financiero tambe a pone cu e calidad di e transmision y ekipo tambe ta laga hopi di desea. Fuera di esey, pago tambe ta un problema pa e trahadonan. 

E CASO

Durante e caso, a mustra varios carta di ABC manda pa doño di e edificio, unda cu ta e.o. confirma cu nan tin un debe grandi y ta gradici e doño pa nan comprension pa por a laga nan opera no obstante e debe. Otro carta ta pinta un cuadro mas severo unda cu ta detaya un cantidad di aña di incumplimento di pago, citando problema cu e.o. truck di operacion y problema cu benta di comercial. Esey a conduci na un patronchi di pago inconsistente, cu tin nan na e punto ey. 

ARGUMENTONAN

Partidonan den e caso a disputa riba e suma cu debe, e suma mensual cu mester paga, y cu ABC tabatin un acuerdo cu e doño pa en bes di efectua pago en efectivo, haci esaki pa medio di un barterdeal, esta ofrece pa pasa propaganda di e doño cu lo mester wordo desconta di e debe cu compania tin. Corte a disputa e acuerdo aki unda cu no por a sali na cla kico exactamente a wordo acorda riba e tema aki. Ademas corte ta mustra cu ABC mes a acorda y acepta e debe cu nan tin pa medio di e corespondencia cu nan mes a presenta. Y mirando e situacion, corte a dicta na fabor di Royal Plaza, ordenando ABC pa paga su debe, y desaloca e edificio dentro di dos siman for di momento cu e sentencia wordo presenta pa medio di deurwaarder na ABC.