Venezuela a declara estado di emergencia despues di dos temblornan fuerte

CARACAS - Den un mensahe den cadena nacional, Presidente interino venezolano Delci Rodríguez a haci un yamada urgente na doctornan, enfermeranan y tur personal di salud pa presenta nan mes inmediatamente na sala di emergencia di hospitalnan y clinica pa atende e hopi personanan herida durante e temblornan cu a sosode.  "Mi ke pidi doctornan, enfermeranan y tur personal di salud pa bay nan puesto di trabou pa nos por atende tur hende cu ta wordo hibá na emergencia di hospitalnan y centronan medico priva," Delcy Rodríguez a declara. Te ainda, gobierno no a publica cifra oficial di muerto of heridonan. Durante su declaracion, Rodríguez tabata acompaña pa presidente di Asamblea Nacional, Jorge Rodríguez, y ministro di Interior, Diosdado Cabello. Ta papianfo di cu por tin entre 10.000 pa 100.000 morto  

AEROPUERTO DI MAIQUETIA CERA

Gobierno tambe a confirma cu Aeropuerto Internacional di Maiquetía, e principal aeropuerto di Venezuela y puerto principal pa Caracas, a wordo cera despues cu e edificio a sufri daño structural serio. Rodríguez a anuncia cu plataforma digital VenApp a keda disponibel pa ciudadanonan por reporta personanan desapareci of daño na nan casnan. Segun gobierno, e sistema ta conecta cu e centro nacional di coordinacion di emergencia pa respondi rapidamente na e situacion.

ARUBA TA OFRECE ASISTENCIA

Presidenta interino a gradici gobiernonnan di varios pais, entre nan Merca, Suiza, Aruba y Colombia, cu rapidamente a ofrece apoyo y asistencia despues di e desastre natural. Institucionnan financiero internacional tambe a expresa nan disponibilidad pa yuda. Gobierno venezolano a indica cu e ayudo ta wordo dirigi principalmente na e estadonan cu a sufri e daño mas grandi.

DAÑO SERIO NA CHACAO Y MARACAY

Reportenan ta indica daño structural grandi na Maracay, y tambe den diferente bario di Caracas, manera Los Palos Grandes y Altamira, den municipio Chacao. Varios edificio a kibra of a cay completamente. Alcalde di Chacao, Gustavo Duque, confirma cu e situacion ta "masha duro" y cu prioridad principal ta sigui busca y rescata sobrevivientenan. "Lamentablemente por tin victima mortal, pero awor nos enfoke ta rescata e maximo cantidad di bisiñanan cu ta ainda bibo," Duque a bisa durante e operacionnan di rescate. Segun informacion inicial, ekiponan di emergencia a logra rescata por lo menos 16 persona cu bida for di e edificionan colapsa. Te laat anochi, miles di residente tabata permanece pafor di nan cas y edificio pa miedo di replica of otro terremoto.

E TEMBLOR MAS FUERTE DEN 126 AÑA

Segun Servicio Geológico di Estados Unidos (USGS), e prome temblor tabatin magnitud 7.1 y a ocurre pa 6:04 di atardi, cu epicentro cerca di Morón, na frontera di estadonan Carabobo y Yaracuy, na un profundidad di solamente 13.2 kilometro. Solamente algun minuut despues, un di dos temblor mas fuerte di 7.5 magnitud a sigui, cu epicentro tambe cerca di Morón y na un profundidad di aproximadamente 10 kilometro. USGS a indica cu e intensidad den epicentro tabata VIII (Severo) riba escala modifica di Mercalli. Segun e entidad, esaki ta e temblor mas fuerte registra den e parti aki di Venezuela den 126 aña, solamente comparabel cu e historico terremoto di magnitud 7.7 cu a sacudi e region na oktober di 1900.

USGS ta splica cu e combinacion di magnitudnan tan halto y profundidad tan chikito ta explica e violento movimiento di tera cu a wordo sinti mas cu 160 kilometro for di epicentro, incluyendo Caracas y diferente region di Colombia.