Lider AVP ta insisti: Ainda ta 'dialogando' pa Marisol Lopez sigui cu AVP

ORANJESTAD - Indicando cu partidonan ta den un 'dialogo' ainda,  Mike Eman den su calidad como lider di partido AVP a purba sigura NoticiaCla.com dialuna mainta cu caminda ta 'habri' pa Marisol Lopez Tromp keda como miembro di e partido berde. E ta un contraste di loke cu Lopez Tromp a bisa NoticiaCla.com siman pasa ainda, ora cu el a sigura cu su desicion pa bandona partido, ta keda un hecho. Esaki hasta despues cu Eman a papia cu ne ora cu Lopez a 'los' di e partido, debi na falta di sosten pa e incidente cu a sosode luna pasa entre su persona y colega di partido Chris Dammers. 

CLARIFICACION 

NoticiaCla.com a puntra Eman dialuna pa clarifica esaki mirando cu Eman algun rato despues siman pasa a declara cu tur cos ta bayendo bon. Dialuna, e mandatario a mantene e postura ey, pero su limitacion di palabra a manda un otro mensahe. "Mi kier limita na bisa cu e dialogo ta andando den un bon ambiente y si bo ta permiti mi, mi ta lag'e te ey" Eman a bisa solamente. Pa un prome minister y lider di partido cu normalmente no tin problema pa vocifera su mes riba tur topico sin problema, esaki tabata un momento diferente.