Lopez Tromp: Desicion pa bira parlamentario independiente ta keda!

ORANJESTAD - Marisol Lopez Tromp no ta cambia di pensamento. Su desicion di distancia su mes di AVP y bira parlamentario independiente (atrobe) ta keda vigente. Asina Lopez Tromp mes a confirma na NoticiaCla.com diahuebs merdia durante e noticiero 'noticiacla-merdia' na Power FM. E ta confirma cu en berdad el a papia e mesun dia despues cu lider di partido Mike Eman, pero cu su desicion ta keda vigente. Esey no kier men cu no por papia, pero no pa cambia su pensamento. Pa loke ta su trabou, esaki a continua diahuebs y tur cos ta bayendo ok. 

COMBERSACIONAN TA CONTINUA 

"Mi tin un desicion cu mi a tuma y mi tin un base pakico mi a tum'e" Lopez a sigui bisa. E combersacion cu Eman tabata mas bien un splicacion con el a yega na e puntonan cu a conduci na su desicion. "Esey ta status quo". Esey no ta kita afo cu e por tin combersacion cu Eman y cualkier otro persona riba e tema ey y of cualkier otro tema. De hecho Lopez a reuni cu miembro di tur tres fraccion riba e tema di independisacion di parlamento, cu ta un topico cu ta carga sosten di tur tres fraccion den parlamento. Trabou como statenlid lo continua segun Lopez, y e ta haci esaki manera semper. "Den esaki nada no a cambia" Lopez a sigui bisa. 

NO A PAPIA CU RENE HERDE

Pa loke ta Rene Herde, Lopez a bisa cu e no a mir'e mas. E ta lamenta e forma con Herde a comunica e problemanan via prensa, cu Lopez ta considera hopi robes pa duna splicacion y opinion y condena. "Siendo cu ni cu mi a wordo papia y no a sinta cu mi tampoco prome cu el a vocifera como lider di fraccion. "Mi no a bay comunica cune via prensa tampoco y cu niun di e otronan" Lopez a bisa. Fuera di a papia cu lider di partido, Lopez ta sigura cu ta un rueda di prensa el a duna, splicando su desicion y su experencia. "Netamente e hecho cu el a scohe pa bay comunica den prensa sin papia cu mi y sin scucha mi banda, a conduci tambe na un parti di e loke a sosode". Foto ta di archivo di noticiacla.com