Eman: Sorprendi cu e desicion extremo di Marisol Lopez Tromp!

ORANJESTAD - "Sorpesa. Bo no ta spera un desicion di e extremo aki" tabata e prome palabranan di un prome minister Mike Eman visiblemente sorprendi riba e desicion di presidente di parlamento Marisol Lopez Tromp algun ora prome. Eman tabata breve mirando cu e tabatin un combersacion pendiente awe ainda cu Lopez Tromp. Debi na esaki e no kier a anticipa un discusion cu lo a bay di un pa otro banda. "Mi ta prefera pa mi por hiba e combersacion ey ainda y semper lo ta dispuesto pa duna mas comentario riba e diferente pensamentonan cu tin y e opinionan cu tin cu a wordo duna" Eman a bisa. Como tal mucho mas e no kier a bisa riba e declaracion di Lopez Tromp. "Tur hende envolvi merece un proceso digno pa nos por atende tambe cu e tema aki na e nivel cu e tema merece di wordo trata" Eman a bisa. 

KICO A HACI DEN E ULTIMO SIMANNAN

Manera ta conoci, mas tempran den dia Lopez Tromp a declara su mes independiente y distancia su mes di e partido berde, debi na 'falta di sosten' y 'abuso den partido'. Eman a mustra tambe riba e simanan prome cu a conduci na e dia di awe, ora cu e dos parlamentarionan a haya nan mes den e incidente den parlamento. "Hecho ta cu ultimo tempo tabatin un situacion toch di comunicacion cu tabata bou di un presion despues cu dos miembro di parlamento a haya nan mes den un conflicto hopi grave. Asina Eman a repasa awe e loke el a haci despues di e incidente unda cu entre otro a referi na e reunion cu a tuma lugar cu tanto Lopez Tromp como Dammers. A palabra cu despues di e biahe di Lopez pa Hulanda, lo a sigui cu e combersacionan riba e inquietudnan cu a surgi rond di e incidente. Y e combersacion entre Eman den calidad di lider di partido y Lopez lo tabata planea caba pa tuma lugar. "Pesey mi a keda sorprendi di e desicion cu cay mas tempran" Eman a bisa. 

A CONDENA INCIDENTE SEVERAMENTE 

Eman a sigura NoticiaCla.com cu el a condena e incidente severamente anteriormente, contrario na e loke ta wordo bisa cu e no a sali na defensa di hende muher. "E condena tabata absoluto y e tabata hopi cla tambe den e comunicado cu nos a saca. Nos ta kere cu e incidente aki ta totalmente inaceptabel y mi ta kere cu nos a expresa esey tambe den un forma hopi hopi cla!" Eman a bisa.