SADA ta desmenti ultimatum di ATIA pa diamars ya cu a palabra otro

ORANJESTAD - No tin ultimatum poni pa diamars atardi, sino diaranson atardi pa soluciona e impasse entre SADA y ASTEC. Asina presidente di e sindicado di douane Eduard Maduro a confirma na NoticiaCla.com diamars mainta. E informacion como tal cu e gremio comercial ATIA (Aruba Trade and Industry Association) a duna pues segun Maduro, ta robes. E palabracion ta cu pa diaranson atardi e cooling off period ta vence. Tambe a palabra cu abogadonan lo intercambia di documentonan relevante, pero esey tampoco no a sosode segun Maduro. E sindicato awe ta para mes caminda cu siman pasa pues no tabatin ningun progreso pa soluciona e impasse.

ATIA TA BRUHA Y TA TROCE PALABRA

E unico cos cu si SADA a haya di ATIA, tabata e notificacion di un caso sumario. "Locual a wordo palabra diabierna ultimo ta cu lo partidonan lo tin te cu diaranson atardi 5'or pa yega na un conclusion" Maduro a bisa. Den cuadro di esey, e sindicato a mustra cu nan tin varios reunion planea prome cu diaranson riba e tema. Entre nan uno cu e minister diamars atardi, sigui pa un reunion cu e trahadonan diamars anochi pa e sindicato defini su punto di bista. E hecho cu ATIA ta papia di diamars como ultimatum, ta pone e ora cu tin un fayo den comunicacion. "Mi ta supone cu nan ta un tiki bruha, pasobra den nan kortgeding mes nan ta informa hues cu a spreek af cu ta te diaranson lo haya un 'graceperiod' unda cu no ta introduci e reglanan, en espera di e desicion kico lo sosode" Maduro a bisa.  Maduro ta bay asina leu di yama e asunto tambe como un 'trocemento di palabra'. 

ASTEC MESTER RESPETA AUTORIDAD 

E hecho cu ASTEC ta exigi tipo di control, no ta e caso segun SADA. Segun e presidente di e sindicato, no ta trata di ken tin rason of no sino cu mester simplemente respeta autoridad. "No por ta asina cu cualkier compania priva por kere cu nan ta yega riba un dienst huramenta uniforma di gobierno y impone", Maduro a sigui bisa. E ta spera cu durante e reunion cu minister diamars atardi, por clarifica tur esaki tambe.