ATIA: Ultimatum poni pa resolve conflicto di waf Barcadera

ORANJESTAD - Si pa diamars atardi no tin acuerdo riba e problema cu a surgi siman pasa cu a conduci cu a blokea entrada di waf di Barcadera, ATIA lo entama un caso sumario den corte diaranson mainta. Den un comunicado di ATIA, e gremio comercial a confirma cu despues cu e stakeholdernan a reuni cu otro ( ATIA y abogado Maura Brown, representando ATIA, a sinta na mesa cu directie di ASTEC, APA, Directie Scheepvaart, Douane, SADA y abogado Chris Lejuez, representando SADA), pa purba yega na un solucion na e desacuerdo riba e regla di seguridad, a bisa cu 'lamentabel no a yega na un solucion diabierna atardi'. 

REUNION DIABIERNA MERDIA

Tabata diabierna merdia cu partidonan a yega na otro pa para e accion di dos dia di e douaneronan, unda cu a yega na un acuerdo temporal. E acuerdo pa sinta na mesa tabata condiciona na douane cooperando pa habri e waf na Barcadera di inmediato pa asina reanuda trabou y evita cu mas daño wordo haci na comercio y economia di Aruba. 

ULTIMATUM TE DIAMARS ATARDI

Pues manera indica caba, na final di e reunion a wordo acorda cu partidonan tin te cu diamars atardi pa yega na un solucion. Sino lo sigui cu e caso den corte diaranson mainta. ATIA di su parti, los di esaki, lo sigui cu un “bodemprocedure” pa asina claim e schadevergoeding di e daño cometi na comercio door di e accion aki.

ACCION ASINA TA INACEPTABEL

Segun ATIA, representando su miembronan y comercio di Aruba en general, nan ta haya inaceptabel cu ta bay over na accionnan asina sin cu purba sinta na mesa prome pa yega na un solucion.  A mustra cu trabounan na waf ya tabata atrasa door di e dianan di fiesta di e siman anterior. E accion aki no ta yuda e situacion y ta añadi mas retraso. Bienestar di pais Aruba mester ta na prome luga, mirando cu Aruba ta depende pa mas cu 95% di importacion di productonan di exterior. ATIA lo sigi e situacion den e proximo dianan di cerca y ta spera cu partidonan envolvi por haya otro na mesa prome cu diamars atardi.