Waf di container na Barcadera a continua cera merdia como protesta

ORANJESTAD - Merdia a habri na waf di Barcadera sin un solucion pa e problema cu a surgi ora cu no a permiti douaneronan drenta e area di trabou. For di mainta e  douaneronan a dicidi di blokea e entrada y salida di e waf unda cu tin cu controla. Ultimo informacion ta cu pa 3'or awe tardi lo mester tin un reunion di nivel halto pa wak si por soluciona e problema. Mientrastanto ningun container por a sali of drenta e area. Solamente personal cu trekker. 

KICO A SOSODE

Segun e presidente di sindicato di douanero (SADA) Eduard Maduro a splica NoticiaClac.com cu no por ta asina cu un security di e compania Astec cu ta maneha e waf, ta prohibi douane pa drenta. "Nan tin varios tempo cu esaki ta andando. Nos a acerca directeur cu e preocupacion aki na varios ocasion y el a bisa cu e ta sostene nos" Maduro a bisa. Segun e lider sindical, no por ta asina cu un personal di seguridad ta pidi e ambtenaar pa baha for di e auto. '" Esey ta pasobra nos ta esun encarga cu e control riba waf, tanto di e goederen, peaton, vehiculo cu ta trafica riba waf". E douaneronan no ta sinti cu e seguridad tin cu controla nan, sino e parti civil. 

KICO E ACCION TA ENSERA

E accion ta ensera portanan cera na Barcadera cu ta pone cu hendenan no por sali y drenta. Pa e portanan por habri, e douaneronan kier un aclareacion permantene pa no tin un situacion asina atrobe. Mester sali na cla kico por y kico por pa evita e situacion den futuro. 

REUNION DI ASTEC

Mientrastanto den mainta a reuni cu directiva di ASTEC unda cu a plantea nan e situacion y a informa nan tambe cu lo keda den accion te ora cu tin un solucion pa e problema. Pa loke ta e duracion di e accion, Maduro a bisa cu e  tin cu haya ok di e director y e ora lo habri e portanan atrobe pa e operacion regular por continua. Por a nota cantidad di trekker cu container para pafo di waf, en espera di e situacion. Den cada trekker tabatin un chauffeur cu un container sin cu nan por a haci algo.