SADA: Accion na porta di waf na Barcadera a continua awe mainta

ORANJESTAD - E accion di douaneronan na porta di waf di Barcadera a continua diabierna mainta pasobra partidonan no por haya otro ainda riba e problema. Segun presidente di e sindicato di douanero Eduard Maduro a splica NoticiaCla.com, gerencia di ASTEC ta para ariba cu huisregels ta sigui vigente. Algo cu e douaneroan no por acepta. Mes momento Maduro a confirma cu gremio comercial ATIA a entama un caso contra e sindicato aunke e no tabatin mucho detayes riba e caso ey.

REUNION URGENTE

Awe mainta e sindicato a yama un reunion urgente na edificio di ASTEC mes na Barcadera, unda cu durante e reunion nan a haya sosten di tur miembro riba e problema cu a surgi for di ayera. "Gran parti di douane a bin scucha e detayes di e situacion" Maduro a bisa. SADA a pone e director di douane na altura cu huisregels di ASTEC no por bay riba un landsverordening cu ta duna douane poder pa actua na waf. "Tanten cu nos no yega na un solucion pa esaki, nos lo keda afo" Maduro a sigui bisa NoticiaCla.com diabierna mainta. 

PROBLEMA DI SEGURIDAD

E problema pa douane ta e forma con seguridad di ASTEC ta atendiendo cu e caso di control. Seguridad kier obliga personal di douane pa baha for di auto durante control na porta, siendo cu no mester. Segun Maduro, e autonan di douane no ta getint y por mira cla cla den e auto cuanto hende tin. E seguridad por conta asina cuanto hende tin, y douane no tin ningun problema pa legimatisa nan mes den e auto. Pero e cuenta di baha for di auto nan no ta di acuerdo cu ne. 

CASO SUMARIO

Mientrastanto ATIA a entama un caso sumario contra sindicato SADA pa obliga nan pa reanuda trabou pa evita mas problema cu economia di Aruba. No ta conoci ki ora e caso aki lo ta.