Bosman: Plasterk su version di geschillenregeling ta alternativa sabi

DEN HAAG – E idea di minister Ronald Plasterk pa cuminsa sikiera cu un tipo di geschillenregeling, (manera cu el a declara na NoticiaCla.com aki)  aunke e no ta esun cu e 4 parlamentonan di Reino a boga p'e, ta un ‘alternativa sabi’. Asina parlamentario Hulandes Andre Bosman a bisa NoticiaCla.com awe mainta for di Den Haag. “Riba su mes, e no ta un mal idea pa cuminsa cu ne” e parlamentario Hulandes a sigui bisa.

MIHO ALGO CU NADA

Segun Bosman, paisnan kier un areglo cu un conseho definitivo. “Y esey no ta negoshabel” e parlamentario a bisa. “Pues bo por scohe pa un ‘acercamento di tur cos of nada’ y e ora tin e chens cu bo no ta haya nada”. Como tal Bosman ta consider'e un paso den e bon direccion manera cu Plasterk a sugeri, y como tal Bosman ta considera un alternativa hopi sabi.

RESISTENCIA DI HERDE

Cu parlamentario di Aruba Rene Herde ta opone fuertemente, tin su motibo segun Bosman.”Esey ta pasobra no ta logrando pa keda cla pa entrega e presupuesto corecto y na tempo. Y como tal e kier desvia e atencion” Bosman a sigui bisa. Herde recientemente a reacciona serca NoticiaCla.com riba e proposicion di Plasterk pa cu e geschillenregeling. El a declara cu e no ta acepta e proposicion aki y tampoco parlamento di Aruba. Den su comentario, el a duna su motivacion tambe pakico. Mester indica tambe cu Bosman, ta conoci pa ta un parlamentario Hulandes hopi fuerte riba posicion di Aruba. Sinembargo na NoticiaCla.com el a declara den pasado cu e no tin nada contra Aruba, pero kier pa tur cos cana manera mester ta.