Herde: Geschillenregeling di Plasterk no ta cumpli cu esun cu a palabra

ORANJESTAD – E proposicion di minister Hulandes Ronald Plasterk pa un tipo di geschillenregeling ‘temporal’, no ta cumpli cu ningun di e puntonan di salida manera acorda entre e 4 parlamentonan (di Reino) na juni di e aña aki. Asina lider di fraccion di AVP, Rene Herde a reacciona na NoticiaCla.com riba e sugerencia di minister Plasterk pa bin cu un ‘geschillenregeling temporal’. Su reaccion ta bin un dia cu Plasterk a presenta su sugerencia na NoticiaCla.com. Mientras cu Plasterk ta papia riba e tema, segun Herde, e ta un version hopi diferente di loke e 4 parlamentonan ta bogando p'e. Y for di e reaccion di Herde, un version cu nan no ta dispuesto pa discuti.

VERSION DI PLASTERK

Segun Herde, repasando e proposicion di Plasterk pa un geschillenregeling temporal, (lesa e articulo cu su proposicion aki), e mandatario Hulandes ta sugeri cu Raad van State por duna meramente un conseho. “Cu esey e por desvia mescos cu loke e la haci cu e conseho pisa di RvS relaciona cu e KB (Instruccion) di 2014” Herde ta remarca. Tambe Plasterk ta hopi cla cu e no kier un ‘sentencia definitivo’ pa un colegio halto independiente di estado. Y segun Herde, Plasterk ta robes pa bisa cu ta trata aki di asuntonan di ‘maneho’.

MOTIVACION DI HERDE

Pa mustra su motivacion di reaccion riba Plasterk, Herde ta repasa e 4 puntonan di salida cu un geschillenregeling mester cumpli cu ne. Entre nan, cu un instancia huridico mester por husga. Nan (e 4 parlamentonan) ta scohe pa sea un Hoge Raad of un Hof independiente pa atende e asunto. E veredicto mester sosode pa medio di decision vinculante. Nan no por ta consehonan cu por wordo ‘poni un banda’ manera cu a sosode cu e ultimo conseho di Raad van State. E mediacion di conflicto mester por sosode prome cu e decision final. E alcanse di e veredicto mester contene tur e detayenan huridico cu ta relaciona cu e Statuut y acuerdonan stipula. “E proposicion di Plasterk no ta cumpli cu ningun di e puntonan aki” Herde ta sigura NoticiaCla.com.

TWEEDE KAMER NO POR TA DI ACUERDO

“Mi no por imagina mi cu Tweede Kamer por bai di acuerdo cu e proposicion aki. Esey lo nifica cu pa di 3 biaha, Tweede Kamer lo desvia di su palabracionnan haci” e lider di fraccion pa e partido berde ta sigui bisa. Aki e ta referi na e tres biahanan cu nan no a haya oido, cuminsando cu 2010 ora cu e mocion cu a wordo acepta pa Tweede Kamer, nunca no a wordo ehecuta. Tambe e palabracion di IPKO cu e geschillenregeling mester tabata cla pa 2013, conforme e mocion di 2010. Y finalmente, e di tres biaha ta durante e reunion di IPKO na juni ultimo, cu Plasterk no a cumpli mientras cu Tweede Kamer ta simplemente mira y no actua, contra Plasterk.

PAKICO HERDE TIN PROBLEMA CU E PROPOSICION

Segun Herde, den e proposicion di Plasterk, ora cu yega momento di berdad, Hulanda semper lo dicidi su so, roba contenido di palabracionnan haci conhunto di Statuut, (despues di 6 aña di negoshacion). Esaki no ta laga ningun base pa un discusion habri y real riba un geschillenregeling husto y independiente: Hulanda kier hunga pa partido y huez parew”. Herde ta sigura NoticiaCla.com cu no ta trata di diferencia di opinion riba asuntonan politico. “Pero riba diferencianan netamente huridico cu tambe segun Raad van State, por wordo husga pa un instancia huridico independiente. “Un acuerdo asina por sosode solamente a base di un acuerdo interno entre paisnan basa riba e rijkswet usando articulo 38 di statuut, y no a base di articulo 12 cual Plasterk ta referi ariba continuamente”. Segun Herde, conseheronan di Plasterk no a lesa e conseho recien di RvS.

DURACION LARGO NO TA BERDAD

Y como comentario final, Herde ta mustra cu e argumento cu implementacion di un geschillenregeling ta dura largo, no ta cuadra at all. Segun e lider di fraccion, e mocion acepta segun Tweede Kamer (pa un geschillenregeling riba nivel di un rijkswet), a wordo acepta 6 aña pasa. “Pues e por tabata cla masha tempo caba, si e deseo tabata t'ey. Pero ainda no ta laat. E por bin hopi lihe, si tin boluntad” Herde a finalisa bisando. E ta referi na un dicho Hulandes traduci, esta ‘ No tin nada tan permanente, manera algo temporal”.