Plasterk habri pa ‘un tipo di’ geschillenregeling temporal

ORANJESTAD – Gobierno Hulandes tin oido pa ‘un tipo di geschillenregeling’, pero no ta cla pa e formato cu e islanan ta boga pe awor. Esun ‘regular’ tin un trayecto largo cu tin cu wordo incorpora pa medio di un ‘rijkswet’. Algo cu lo dura ainda. “Pero nos ta dispuesto pa un tipo di geschillenregeling den un forma riba termino cortico, unda cu tur partnernan por keda atendi. Elo no ta ‘perfecto’, pero por lo menos e ta algo” e minister encarga cu asuntonan di Reino, Ronald Plasterk a splica NoticiaCla.com awe mainta prome cu el a sali pa Corsou. E ‘areglo’ aki por funciona pa un periodo di 2 aña, y lo wak con esaki ta funciona. Mientrastanto lo traha riba e ‘berdadero’ geschillenregeling. Plasterk tabata di bishita na Aruba pa un dia, y a continua su biahe awe mainta pa Corsou.

PAKICO AWOR SI

NoticiaCla.com a puntra e mandatario pakico diripiente e positivismo riba e tema, siendo cu recientemente ainda a hal'e un banda y bisa cu ‘nos no ta cla pa algo asina pa awor’. “Mi ta di acuerdo cu mester bin un geschillenregeling definitivo regla via un rijkswet” e mandatario a admiti. Pero esey lo dura largo. “P'esey mi a sugeri pa bin cu un tipo di regeling a termino corto cu por funciona mas of menos asina y relativamente bon” Plasterk a bisa NoticiaCla.com.

STRUCTURA DI UN GESCHILLENREGELING TEMPORAL

E forma con esaki lo funciona ta, cu lo bin un tipo di comision unda cu e paisnan den Reino por acudi ora cu tin un disputa, y cual disputa finalmente ta wordo presenta na Raad van State. De hecho, RvS ta constela pa miembronan di tur e paisnan den Reino. RvS por bin e ora cu un tipo di conseho ‘pisa’, cu mester yuda cu e decision final di e disputa. “Esey no ta un garantia si cu esey ta bira e decision final” Plasterk ta sigui bisa, indicando cu toch un decision di RvS no ta ‘bindend’ y cu ta duna paisnan e libertad pa ‘desvia’ di e conseho di RvS. “Mientrastanto ta traha riba e geschillenregeling, manera cu e mester keda regla.

NO TIN TEMPO MARA PA INTRODUCCION

Riba e termino cu cual kier introduci esaki, e mandatario Hulandes no kier a compromete su mes cu ne. El a bisa solamente cu prome minister Eman a pidi'e pa e mes trata esaki internamente y purba bende esaki na parlamento di Aruba y bin bek cu un contesta ora cu ta asina leu. Y esey Plasterk a bisa di por biba cu ne.