Den fin di siman, aeropuerto di Aruba a fungi como base preparativo pa avionan di ayudo pa Venezuela

ORANJESTAD – Aeropuerto Internacional Reina Beatrix a biba un fin di siman diferente, mientras e comunidad aeroportuario a reuni pa prepara e salida di buelonan humanitario cu lo brinda asistencia na Venezuela despues di e devastador temblornan cu a sacudi e pais bisiña. Varios di e avionan tabata aleman, mientras cu algun tabata mericano. 

Segun Aruba Airport Authority (AAA), e operacionnan special aki ta rekeri coordinacion estrecho entre diferente partnernan di aeropuerto pa garantisa cu e buelonan sali di forma sigur y eficiente. E preparacionnan lo continua den e dianan benidero mientras Aruba ta mantene su disponibilidad pa apoya e misionnan humanitario.

E buelonan ta forma parti di e esfuerzonan regional pa entrega personal di rescate, experto medico y suministronan esencial na e area cu a wordo mas afecta. Esaki ta banda di e anuncio di Gobierno di Aruba cu a anuncia cu un equipo di experto lo bay Venezuela pa brinda asistencia humanitario, incluyendo medico, ciruhano y enfermeronan, una vez cu e situacion logistico riba tereno ta permiti.

Aruba Airport Authority a expresa su aprecio na tur empleado, autoridad y organisacion cu ta traha tras di escena pa haci e operacionnan aki posible.

“Nos ta gradici tur persona cu ta contribui cu profesionalismo, cooperacion y compromiso pa asegura cu e importante misionnan humanitario aki por desaroya di forma sigur,” segun e aeropuerto.