- Minister Hulandes di Husticia van Weel a bishita wardanan di polis na Aruba awe
- Van Haasen(PVV): Bergonsoso cu na Corsou, partido lidera pa hende cera den prizon, ta bay eleccion
- Veldkamp: Hulanda lo actua contra Venezuela despues di expulsion di diplomaticonan
- Feco Gomez(AMAK): Arubianonan ta participa atrobe den festival di Tumba di Corsou
- Zoetrum (CTB): Corsou tin un sin fin di actividad pa Arubianonan den 2025
Gobierno ta sigui entrega rapportahenan laat na CAFt
ORANJESTAD – Gobierno di Aruba ta sigui den incumplimento ora cu ta trata p.e. entregamento di documento. Recientemente e colegio di supervision financiero CAFt a bolbe hala orea di gobierno riba e tardansa. “Riba 29 di februari 2024, Colegio di supervision financiero di Aruba (CAft) a ricibi e informe di implementacion (UR) di Aruba tocante di e di tres kwartaal di 2023” e colegio ta cuminsa na bisa. Y no ta prome biaha cu gobierno ta laat, y no solamente cu e UR, sino cu otro temanan tambe. Notable ta cu na comienso di aña aki caba, CAFt a reclama caba riba un situacion asina, cu Noticiacla tambe a raporta e tempo ey. Y ainda gobierno ta sigui cu e tardansa.
SANCION?
Loke ta ‘scapa’ gobierno, ta cu no tin sancion mara na e tardansa, cu mes momento ta un frustracion pa e colegio. Nan por solamente sanciona gobierno si e no cumpli cu e normanan manera stipula den e ley y of e protocol vigente.
GOBIERNO TA LAAT
“En virtud di e Ordenanza Nacional di Aruba di supervision financiero (Landsverordening Aruba financieel toezicht – LAft) mester a entrega e UR aki pa mas tarda riba 13 di november 2023”, pues mas di 3 luna laat.
RECLAMO ANTERIOR
Tabata na januari ultimo cu e colegio di supervision financiero CAFT a critica gobierno di Aruba cu e retraso di entrega informenan di implementacion di Aruba cu bastante retraso. Segun e ultimo conseho di CAFt, esaki no ta cos nobo, sino cu ta sosode "desde final di 2021". “CAft a pidi atencion pa esaki varios biaha, entre otro den su cartanan di 21 di juli 2023 y 18 di augustus 2023” e la bisa e tempo ey E retraso structural den e entrega di e informenan di implementacion ta limita e posibilidad pa por comproba si e presupuesto ta realistico of si durante e aña e lo rekeri modificacion’, e colegio ta sigui bisa. “Ademas, e falta di cifranan di realisacion actual ta limita e derecho di budget di Parlamento. P'esey, CAft ta bolbe pidi boso pa observa e plaso legal prescribi den e LAft pa entrega di e UR” e colegio a sigui.
POR TRAHA TOCH
A pesar cu CAft no a ricibi informacion formal di implementacion, e ta bisa si cu e ta dispone di cifranan di realisacion mas actualisa di e ingresonan di impuesto te cu september y e imagen mas actual di e resultado anticipa di e sobra entidadnan di e sector colectivo. CAft a ricibi e cifranan aki di Aruba y a involucra nan den e evaluacion di e di dos UR. A base di e informacion aki, CAft ta anticipa cu Aruba lo por sera e aña 2023 cu un surplus di financiamento di e sector colectivo di aproximadamente AWG 170-190 miyon. NOTA: E potret ta di archivo di Noticiacla.
ATA: Tripadvisor ta premia Aruba como e ‘Mihor Destinacion den Caribe’
ORANJESTAD - Aruba Tourism Authority (A.T.A.) ta orguyoso di anuncia cu Aruba a wordo reconoci pa premiacion di Tripadvisor’s® Travelers’ Choice® 2024. E premio prestigioso aki ta honra destinacionan cu ta ricibi evaluacionan excepcional, consecuentemente Aruba ta bira e mihor destinacion den Caribe y e di binti cuater mihor destinacion di registro mundial riba Tripadvisor.
Diederik Kemmerling re-eligi como presidente di Camara di Comercio
ORANJESTAD – Diederik Kemmerling a keda re-eligi pa presidente di Camara di Comercio pa 2025. Conforme e stipulacion den ley, Camara di Comercio y Industria (KvK) ta representa comercio y industria di Aruba. E directiva di KvK, cu ta consisti di 9 miembro, ta wordo eligi door di representantenan di negoshinan grandi “grootbedrijf” como tambe di negoshinan chikito “kleinbedrijf”. Den e prome reunion di directiva di KvK, e miembronan ta eligi un presidente y un vice-presidente pa e aña actual. Alabes ta keda determina cual miembro lo fungi como e presidente suplente. E presidente y vice-presidente, hunto cu e secretario/director ehecutivo, ta forma e directiva diario di KvK.
Trahadonan di Caribbean Palm Village a bay den accion
ORANJESTAD – Entre 30 pa 40 trahado di Caribbean Palm Village a dicidi di pone trabou abou diahuebs mainta, pa protesta e hecho cu gerencia di hotel no ta cooperando cu e CAO nobo. Segun president di e sindicato FTA Jose Figaroa, e negosacionan pa e CAO nobo a tranca y trahadonan ta decidido pa bringa pa nan derecho. Por lo menos 3 punto ta cardinal, entre nan aumento salarial y bonus, cual e gerencia no kier condeci. A dicidi pa pone trabou abou, cu asina ta bira e prome accion pa 2025 na Aruba. E accion segun Figaroa, ta afecta e operacion ya cu ta encera personal di housekeeping y tambe front desk. Y si despues di e accion, cu tabata poni pa caba 10’or awe mainta no tin solucion, tin pensa pa escala esaki, pero e ora den fin di siman ora cu e efecto ta mas grandi.
ATA: Varios factor a pone British Airways cancela ruta di Aruba
ORANJESTAD – “British Airways a tuma e decision dificil pa descontinua su servicionan pa Aruba segun e proximo temporada di zomer”, asina CEO di ATA Ronella Croes a confirma e noticia di noticiacla diaranson. E ultimo buelo lo wordo opera dia 30 di mart 2025.
DIMP: Tarifa di inkomstenbelasting y loonbelasting a cambia entrante 1 di januari 2025
ORANJESTAD – Entrante 1 di januari 2025 lo tin cambio den e tarifa di inkomstenbelasting y loonbelasting. Manera conoci e mesun tarifa cu ta valido pa inkomstenbelasting ta valido tambe pa loonbelasting. E tarifa aki ta hopi importante tanto pa e persona priva, doño di trabou y comerciante cu tin empresa propio. E cambio ta encera un reduccion di e actual tarifa, cual ta nifica cu mayoría di e contribuyentenan lo bay paga menos inkomstenbelasting y loonbelasting den aña 2025. Specialmente e clase trahado lo bay ripara cu su doño di trabou lo bay retene menos loonbelasting durante 2025 compara cu 2024 y asina e empleado lo ricibi un suma di salario mas halto den su man. Pa loke ta e suma liber di impuesto, esaki ta keda Afl. 30.000.
British Airways ta stop cu su buelonan pa Aruba
ORANJESTAD – E aeroliña britanico British Airways ta stop di bula pa Aruba entrante maart di e aña aki. Ta exactamente despues di dos aña di a introduci e buelo aki pa Aruba, cu e ta stop. Tabata na maart di 2023 cu Aruba a yama bonbini na e prome buelo pa Aruba, despues di 10 aña di preparacion. Oficina di turismo di Aruba lo a confirma e informacion aki internacionalmente. E aeroliña tabata bula dos biaha pa siman pa Aruba. Dentro di poco, lo tin mas informacion riba e desaroyo aki.
Follow NoticiaCla
