Minister Maduro ta bolbe confundi e raportahe di S&P riba ratings pa Aruba

ORANJESTAD – Un biaha mas, minister di Finanza di Aruba Xiomara Maduro a ‘confundi’ e raportahe di rating di Aruba di un agencia di rating internacional, y splica cos cu no ta manera e ta realmente. Esey ta mustra cu sea e minister no ta compronde cierto parti di e rapport of intencionalmente ta informa incorecto cu su propio forma di analisa, door di su confusion y tambe omission di cierto parti di e rapport. For di su reaccion na noticiacla, ta mustra cu e ta e ultimo, y cu e splicacion di e mandatario ta pober y mester ta mas ‘cla’, envez di confudi cos cu otro. Menos mal si cu e minister ta pone e link, unda cu tur hende mes por lesa, e realidad di e rapport. Tanto e cosnan positivo, y e partinan negativo, cu e minister ta ‘ometi’ di su articulo. 

FANFARIA

E mandatario diamars ultimo cu hopi fanfaria a anuncia cu e agencia di ratings internacional Standard & Poor's (S&P) a publica su rapport positivo riba e estado economico di Aruba. Den e caso aki, e agencia a anuncia cu e la revisa su panorama di stabiel pa positivo. Mes momento e ta afirma y mantene e rating (cualificacion) na BBB, cu ta igual na esun di aña pasa manera Noticiacla a raporta tambe na 2023, pero= cu de facto tabata un downgrading di BBB+ na 2021. Gobierno mientrastanto (lesa: minister di finanza Xiomara Maduro) un biaha mas (ultimo biaha tabata ora di a raporta incorecto riba e rating di Fitch Ratings) a informa esaki di un forma incorecto, bisando cu S&P ‘a upgrade e rating di Aruba di stabiel pa positivo’. Algo cu no ta corecto y mescos cu biaha pasa a bruha cos. Riba reaccion di e minister na noticiacla, e la bisa cu ‘tin mas manera pa splica’ y cu esey e ta sigura cu e loke e la informa ta ‘corecto’.

KICO STANDARD AND POOR TA BISA

Segun e rapport original di S&P, (cu e minister mes a pone tambe cu link pa tur hende mes lesa) riba 19 di maart 2024, a ‘revisa’ su ‘panorama’ (di Aruba) di stabiel pa positivo (textualmente na ingles: On March 19, 2024, S&P Global Ratings revised its outlook on Aruba to positive from stable)  y a afirma su credit rating di BBB ( and affirmed its 'BBB' long-term and 'A-2' short-term foreign and local currency sovereign credit ratings. The transfer and convertibility assessment is unchanged at 'BBB'). Cu e splicacion di e mandatario, e ta confundi e panorama, y e credit rating cu otro, cu ta dos cos diferente. E mandatario su version ta bisa textualmente: “ Recientemente Minister Maduro di Finansa a haya e grato noticia cu e compania di rating Standard and Poor's (S&P)ta 'upgrade' Aruba su rating di 'stable' pa 'positive' despues di haci nan evaluacion financiero di Aruba na februari ultimo”. Algo pues cu cu no ta corecto, conforme e mesun rapport di S&P. Aña pasa caba, dia 22 di maart 2023, S&P a lansa su raportahe unda cu ey caba, tabatin e credit rating di BBB, pues e rating no a cambia, aunke cu e mandatario kier pretende cu esaki si ta e caso. 

REACCION MINISTER

Ora cu e portal aki a referi na e coreccion aki, e mandatario a reacciona den forma defensive, cu noticiacla ta ‘busca semper algo pa critica’, y cu ‘tin mas manera pa splica’ y pa ‘bay lesa e rapport’. Pa lesa e rapport completo, click AKI