Standard & Poor's a baha cualificacion di Aruba di BBB+ pa BBB

Posted on 03/16/2021 10:36 am AST | Updated on 03/16/2021 10:37 am AST

ORANJESTAD – E agencia di cualificacion Standard & Poor's a baha Aruba su cualificacion di termino largo di BBB+ pa BBB. Asina e agencia a informa dialuna. Gobierno di Aruba mesora a reconoce esaki y raporta riba dje. Segun gobierno, e agencia a papia cu varios instancia, incluyendo gremionan, CAft y gobierno despues di cual nan a presenta nan analisis di e situacion.

E CRITERIA

Segun criteria di S&P, e motibo principal di e bahando di e cualificacion ta e hecho cu Aruba lo mester depende grandemente di fiansa pa funda su gastonan, cu ta manda e nivel di debe aun mas halto. S&P tambe ta admiti cu Aruba ta e pais mas exponi pa turismo di tur e paisnan cu nan ta cualifica. Nan ta premira cu e sla severo di e pais pa cu e efectonan di Covid19 lo perdura mas largo cu nan a premira. Mientrastanto e panorama, unda aplicabel, lo ta ‘stabiel’.

E PANORAMA

E panorama stabil ta balansa e presion riba e finansas di Aruba, debi na e efectonan prolonga di e pandemia di Covid19 riba turismo y e economia, unda cu nan (S&P) ta asumni cu e pais lo mantene su acceso continuo na financiamento concesionario. Esaki acopla cu implementacion exitoso di e pakete di reforma, lo por conduci na un possible alivio di e debe y cu tempo, resultado fiscal mas faborabel. S&P ta considera e acuerdo cu Hulanda na 2020 (COHO) como un desaroyo positivo, pero e implementacion di e medidanan bou di e acuerdo, ta importante pa sigura financiamento di Hulanda.

FUTURO

S&P ta bisa ademas cu nan lo por baha e cualificacion dentro di dos aña si tin dificultad pa implementa e reforma fiscal acorda cu Hulanda pa asina stabilisa e resultado fiscal di gobierno, cu por conduci na un deficit persistente lartgo y debe aun mas halto cu lo por surpasa e proyeccion actual di S&P. Si e dificultadnan aki tambe debilita e relacion bilateral, señalando un kiebro den forza institucional, S&P por baha e cualificacion cu un of dos punto. Lesa e rapport completo AKI.