Noticiacla:Crisis team ta cuestiona parti di raportahe riba scarsedad di test

ORANJESTAD – E testnan cu ta wordo haci di COVID19 na Aruba ta cabando y cu hospital (segun minister Dangui Oduber) a informa cu a reorder y cu tin un lote nobo na caminda. Esaki ta loke noticiacla.com a publica diahuebs. A tuma nota di e reaccion di Crisis Team riba esaki. Segun e team, “no ta berdad cu testnan ta cabando den e cantidad cu por tin consecuencia cu Aruba no por sigui haci test of cu menos test lo bay ser haci”. Sinembargo, e portal aki ta para riba su informacion, cu e informacion cu nos a presenta, tabata e berdad. A te hasta cita e informacion di e minister encarga (Dangui Oduber) cu mes ta confirma cu tin escases etc. Loke no ta wordo bisa, y ta e info cu e portal aki a skibi, ta cu debi na scarsedad mundial di test (publicacionan internacional), cu e por a tarda pa yega prome cu e lote actual caba, cu e consecuencia pa esaki. Cu Crisis team kier cuestiona esaki, ta nan derecho, pero atrobe ta informacion cu e portal aki tin confirma. Cu awor ta bira conoci cu nan ta yega diadomingo awor, (info di e portal aki ta mas specifico), ta sigur un ‘bon noticia’, cu por evita problema.  

E  COMUNICADO DI DVG

Esaki ta e comunicado di Crisis Team cu a keda publica riba e informacion di e portal aki mas tempran awe. “Observando un publicacion cu a sali riba un website di noticia, Team di Crisis di Gobierno ta desea di informa comunidad cu no ta berdad cu testnan ta cabando den e cantidad cu por tin consecuencia cu Aruba no por sigui haci test of cu menos test lo bay ser haci. Ayera anochi Minister Dangui Oduber y Dr. Rodenburg a informa cu ta berdad cu hopi test a ser haci y cu Aruba ta un di e paisnan cu mas test a haci per capita na mundo. Esaki ta logico cu a afecta e stock, pero no pa afecta e cantidad di test cu ta ser haci diariamente. Den e conferencia di prensa Minister Oduber a bisa tambe bon cla cu a haci pedida caba pa mas test. HOH a confirma cu weekend aki mes ya e cargamento nobo di test ta yega Aruba. Crisis Team ta lamenta e forma con e noticia a sali publica, pueblo por ta trankil”.