Testnan pa COVID19 na Aruba ta cabando, cu tur su consecuencia

ORANJESTAD – “Berdad, tin un escases di cantidad di (COVID19) test (pa Aruba)”. Asina minister Dangui Oduber ‘porfin’ a confirma pa noticiacla diaranson anochi durante e COVID19 briefing. Ta bisa porfin, pasobra fuentenan fidedigno envolvi cu e proceso a confirma esaki for di siman pasa pa noticiacla.com. Pero siman pasa ainda, DVG a desmenti esaki na e portal aki. Mientrastanto, Oduber diaranson anochi a bisa e portal aki mesora tambe, cu hospital lo a haci ‘re-order’ di test nobo caba. Sinembargo, e portal aki a compronde cu no tin garantia cu esaki ta nifica automaticamente cu lo haya un cantidad pa sigui mesora esta na tempo prome cu e cantidad actual caba. Pues por surgi un periodo cu no tin test y cu lo por stop testmento temporalmente. Y e pregunta e ora ta, kico lo pasa cu turistanan tambe cu yega Aruba y cu tin cu test na aeropuerto. Con lo para cu esaki. 

TESTING

E filosofia cu gobernantenan y miembronan di crisis team mes a bisa for di cuminsamento di e pandemia aki, ta cu ta logico cu mas bo test, mas casonan positivo ta bin dilanti. Pero, awor e mandatario di salud ta bisa cu no ta pasobra  cu testnan ta cabando, cu tin menos caso positivo.  Algo cu expertonan medico cu cual e portal aki a papia, ta cuestiona .

ORDER 

Si tene na cuenta cu na Hulanda te hasta, tabatin problema cu e capacidad di test, Aruba no ta diferente. Na Hulanda, a haci e fayo di no opta pa laga otro laboratorionan grandi haci testnan masivo, cu ta necesario den tempo di pandemia. A opta pa tene e testmento controla pa sigura ‘calidad’ y tene esaki entre laboratorionan chikito di hospital na Hulanda. Pero esey a pone cu na caminda e capacidad a resulta mucho poco. Awor porfin a bay di acuerdo pa laga lugarnan manera Alemania asisti pa medio di laboratorionan grandi cu por test den cantidadnan mas grandi. 

TEST MASAL

Mas e capacidad di test aumenta, mas hopi hende por acudi y asina mas liher por haya contene e virus, ya cu e ora hendenan por sa si nan tin e of no, y por cuida nan mes y otronan. Tanten esaki no sosode, tin e posibilidad cu hendenan cu tin e virus, ta cana rond y plama esaki sin sa, cu tur consecuencia.