Crisis team: Tin suficiente (COVID19) test y mas ta yega Aruba e weekend aki mes

ORANJESTAD – Crisis team di gobierno di Aruba diahuebs merdia a reacciona riba un articulo di e portal aki, noticiacla, riba e scarsedad di e testnan. Esaki ta e comunicado cu nan a manda riba esey. “ Observando un publicacion cu a sali riba un website di noticia, Team di Crisis di Gobierno ta desea di informa comunidad cu no ta berdad cu testnan ta cabando den e cantidad cu por tin consecuencia cu Aruba no por sigui haci test of cu menos test lo bay ser haci. Ayera anochi Minister Dangui Oduber y Dr. Rodenburg a informa cu ta berdad cu hopi test a ser haci y cu Aruba ta un di e paisnan cu mas test a haci per capita na mundo. Esaki ta logico cu a afecta e stock, pero no pa afecta e cantidad di test cu ta ser haci diariamente. Den e conferencia di prensa Minister Oduber a bisa tambe bon cla cu a haci pedida caba pa mas test. HOH a confirma cu weekend aki mes ya e cargamento nobo di test ta yega Aruba. Crisis Team ta lamenta e forma con e noticia a sali publica, pueblo por ta trankil”. Te aki e comunicado di crisis team di gobierno.