Wever: Casi henter Aruba a keda sin paga nan utilidad debi na COVID-19

ORANJESTAD – Casi henter Aruba a keda sin paga nan cuenta di utilidad ora cu e crisis di coronavirus a cuminsa. Asina prome minister Evelyn Wever Croes a bisa diabierna anochi durante e briefing riba coronavirus. E situacion ey a crea un problema ‘gigantesco’ pa e companianan di utulidad. Como tal, ta solamente esnan cu a haya e ultimo ayudo di FASE, lo Gobierno di Aruba purba sigui yuda cu e cuentanan di utilidad.   Noticiacla a puntra e prome mandatario cu mirando cu gobierno a anuncia un extension di ayudo di FASE, si esaki tambe ta nifica cu lo pidi e companianan di utilidad pa na prolonga nan moratorium di pago tambe. 

KICO A SOSODE

Manera ta conoci, ora cu e crisis a cuminsa, gobierno a pidi e companianan di utilidad manera WEB y Elmar pa no haci cobransa y tampoco pasa pa corta e servicio na clientenan. Ambos compania a duna oido na esaki, cu a nifica cu no a cobra y of corta servicio di cliente pa e periodo di tres luna. Pero e hecho cu ‘casi’ henter Aruba a tuma moratorium riba e pago. “Y esaki a crea naturalmente un problema gigantesco pa e companianan aki” Wever a splica, contestando pregunta di noticiacla.com. Ta lamenta e actitud aki, pasobra segun Wever, tin un grupo di persona cu no a bay asina atras den entrada y por a sigui paga e recibonan sin problema.”Nos no a conta cu esaki. E periodo di moratorium tabata un periodo demasiado duro pa e companianan, y aworaki ta momento cu nan mester cuminsa cobra” Wever a bisa. 

KEDA DEN FASE

A splica cu e cantidad di persona cu a keda den FASE, a keda reduci considerablemente. E prome grupo di persona cu a haya FASE, tabata prome cu subsidio di salario tabata cla, cu ta mas of menos 9000 persona. Pero e di dos grupo, tabata entre dos pa 3 mil persona. Y pa e grupo aki, gobierno lo purba di sigui den contacto cu e companianan di utilidad WEB y Elmar, pa duna nan un of otro tipo di areglo. Pero manera cu e portal aki a raporta anteriormente, e dos companianan a cuminsa saca aviso caba pa corda tur hende cu mester cuminsa paga nan cuenta sino tin chens cu esaki por wordo corta. Pero, ta ofrece areglo di pago si, na esnan cu pidi esaki. De lo contrario, esnan cu no a paga, lo haya nan servicio corta.