WEB y Elmar a avisa clientenan pa cuminsa paga sino por keda sin servicio

ORANJESTAD – Comunidad di Aruba mester cuminsa paga su cuentanan atrasa di utilidad (WEB y ELMAR) of yega un areglo di pago sino por tin chens cu por haya nan servicio desconecta. Esaki tabata e mensahe cu ambos compania a cuminsa suministra e siman aki publicamente. For di WEB, e vocero Asja Dongen a bisa noticiacla cu nan ta den deliberacion ainda ki dia ta bay cuminsa desconecta atrobe. “No tin fecha fiho ainda. 

AREGLO DI PAGO

Pesey ta urgi cliente cu tin cuenta habri pa paga mas liher posibel of pa cera un areglo di pago cu WEB ” Dongen a bisa. “ Si bo tin areglo bo no ta wordo desconecta. E siman aki tur cliente cu tin cuenta habri a haya carta na cas cu e suma cu nan debe y cu e peticion pa nan paga of cera un areglo di pago. Ta prefera pa haci peticion online, pero tambe por hacie na WEB” Dongen a finalisa bisando. Mescos ta conta pa Elmar. Nan tambe a manda mensahe publico pa cuminsa consientisa comunidad cu e ‘periodo di gracia’ ta pasando y cu pronto cos lo ta ‘normal atrobe’. Elmar a anuncia specificamente cu entrante 1 di juli 2020 e operacion lo ta ‘normal’ atrobe, cu ta nifica cu esnan cu no tin areglo di pago, y tin cuenta atrasa, por core risico cu ta bay corta nan coriente.