Wever: Colegio San Nicolas no bay cay mas bou di De Schakel

ORANJESTAD – Colegio San Nicolas (CSN) lo no cay mas bou di Stichting Onderwijs Combina, cu ta maneha De Schakel entrante e aña escolar nobo. E decision tuma anterior di minister Lampe a keda revoca y revisa. Minister president Evelyn Wever Croes a anuncia esaki diabierna anochi durante e briefing riba COVID0-19. Cu esaki e ta purba trece trankilidad bek den enseñansa, riba e tereno aki y mas asunto cu tambe a wordo para. Loke si ta tuma lugar ta cu lo bin un management team cu durante un aña, hunto cu docentenan di e scol lo delibera posibel implementacion di un asina yama Twee Talig Onderwijs (TTO) ta posibel. E mandatario a sigura cu ta un decision cu minister di enseñansa Rudy Lampe mes a tuma, pero ta conoci cu despues di e protestanan y inquietud, gobierno a cay aden y awor a draai bek e decision aki. 

CANCELA E IDEA ANTERIOR

E idea anterior tabata uno di minister Rudy Lampe cu a anuncia cu e aña escolar aki lo tin un cambio grandi unda cu e fundacion cu ta maneha e scolnan De Schakel, lo tuma e maneho di e scol CSN over entrante e aña escolar nobo aki. E motibo principal tabata pa mehora e slagingspercentage di e scol. E decision aki a trece hopi problema na e scol unda cu gran mayoria di e docentenan a acerca e portal aki y a mustra cu nan no ta bay forma parti di e cambio aki. Awor nan por keda trankil cu e cambio lo no tuma lugar mas.