De Schakel lo haya subsidio di gobierno y tuma Colegio San Nicolas over

ORANJESTAD – Gobierno di Aruba a dicidi pa medio di un decreto ministerial, pa e scol Schakel College tambe bira un di e scolnan (priva) cu gobierno lo subsidia pa casi 100% entrante 1 di januari 2021. E tipo di subsidio cu gobierno lo duna lo bira algo mescos cu ta e caso aworaki pa otro fundacion di scolnan na Aruba (p.e. SMOA, SKOA). Actualmente e scol ta uno financia particularmente, mescos cu ta e caso e otro parti di e fundacion cu ta maneha tur e facetanan di De Schakel, manera esun pre escolar, basico y esun secundario, esta Stichting Onderwijs Combina (SOC). 

SOC LO MANEHA CSN

Loke a hala atencion ta cu fuera di esaki, gobierno a aproba pa laga SOC, tuma maneho di Colegio San Nicolas (CSN) entrante e aña escolar 2021-2022. Den e Decreto Ministerial (den poder di noticiacla.com) firma 28 di april ultimo, minister di enseñansa Rudy Lampe a nombra un ‘coordinatie team’ cu tin e tarea pa entre otro prepara trabou pa SOC tuma CSN over. Ademas tin cu busca miembro pa un ‘interim-team’ cu lo tuma maneho di CSN over entrante augustus 2020. 

APROBACION LIHE

Tambe loke a hala atencion ta e liheresa cu cual conseho di minister a aproba e peticion di SOC pa e cambionan menciona tuma lugar. E aprobacion a bin riba 17 di maart 2020, apenas 1 dia despues cu gobierno a ricibi dicho peticion (16 di maart 2020) pa tuma responsabilidad di CSN over. E peticion pa e fundacion haya subsidio di gobierno mientrastato si a bin mas prome, (2 luna) esta dia 20 di januari 2020. Pero ta riba e mesun dia cu a aproba cu SOC por tuma maneho di CSN over, a aproba e decision di subsidia e scol. Y for di informacion cu e portal aki tin, te cu awe, docentenan di CSN mes no tin ningun informacion di e cambio aki. 

PAKICO E PETICION

E peticion di SOC segun nan pensamento riba nan pagina di facebook, ta cu e cambionan menciona, ta basa riba e idea cu nan kier logra mehora e calidad di enseñansa na CSN pa asina e ‘tambe’ bira di e mesun nivel halto cu de Schakel College tin cu asina yama ‘slagingspercentage’ halto di 90% (envez di e 56% cu ta e ultimo slagingspercentage na CSN segun informacion cu e portal aki tin). Y nan kier a ‘riba termino corto’ pa e resultadonan di CSN bira mescos. SOC a anuncia tambe cu nan lo cuminsa cu enseñansa bilingual (ingles y hulandes) den 2020 pa cual nan lo crea un modelo local, diferente cu esun di Hulanda, debi cu mientras ta duna les na dos idioma, regla ta keda cu e examen final mester tuma lugar na Hulandes. E fundacion ta papia cu e cambionan menciona por cumpli cu e deseo politico pa tin un school havo, mavo na Noord tambe. De Schakel College mes, ta existi 12 aña caba como school particular. Entrante augustus 2020, ta e intencion pa habri porta pa un grupo mas grandi di alumno. E scol lo cu desde januari 2021 lo haya subsidio di caha di gobierno, lo keda bou di maneho di SOC si, y lo ‘maneha e scol di mesun forma di semper’ segun nan splicacion riba nan pagina di Facebook. Pa loke ta de Schakel basisschool, esaki si lo keda financia di forma particular, esta sin subsidio di gobierno. De Schakel semper tabatin e reputacion di ta un scol unda cu muchanan di mayornan cu modo financiero halto tabata atende y cu nan prestacion tabata mucho mas halto cu otro scolnan na Aruba. Cu esaki, e prijs plaatje pa por ta na e scol ey tambe, ta mucho mas halto. Informacion cu e portal aki tin, ta cu mientras cu e suma cu ta paga awor pa CSN ta den careda di algo mas di 1.000 florin, esaki por triplifica ora cu SOC tuma over. SOC ta papia di cu e contribucion di mayor lo consisti di un contribucion di actividad, y uno pa e enseñansa bilingual (TTO-bijdrage). Fuera di esaki lo tin gastonan pa buki. Docentennan sinembargo di CSN no tin ningun informacion y kier sa e.o. con lo haci cu e normative pa por drenta scol, e forma di anda cu e material y mas. Hopi informacion cu ainda esnan cu mester bay deal cu e cambio, mes no ta na altura di dje. Recientemente ainda e portal aki a acerca e minister di ensenañsa Rudy Lampe pa su reaccion riba e tema aki y mas, pero e mandatario no kier a duna e portal aki un reaccion, y a opta mas bien pa tuma contacto cu director di directie onderwijs. 

HISTORIA

Tabata na October di 1994 cu un grupo di mama a lanta e werkgroep CombinA, cu e intencion pa lanta scol basico De Schakel, pa muchanan di 4 pa 12 aña. A haya un localidad na Dakota (Patiastraat 13). Dos docente a inicia 21 di augustus 1995 cu 18 alumno. Fin di e aña escolar esaki a bira 42. Na 1996 na Boegoeroei, a traha e edificio actual. Na 2007 a expande e scol basico cu Peuterschool Prikichi pa enseñansa pre escolar y na 2008 a lanta Schakel College pa MAVO, HAVO y VWO den un area apart. Desde 2016, tur e scolnan ta riba un localidad. Despues di casi 25 aña di existencia, e scol total ta conta cu 430 alumno.