Placa cu CAFT a conseha pa Aruba haya, no ta suficiente

ORANJESTAD – E suma cu e colegio di supervision pa Aruba CAFt a recomenda na Rijks Minister Raad (RMR) pa Aruba haya como ayudo financiero pa e crisis di coronavirus, no ta suficiente. Asina e prome mandatario a reacciona riba e pregunta di noticiacla.com diamars anochi durante e briefing riba coronavirus. Manera e portal aki a raporta anteriormente, e colegio su presidente a manda su conseho diamars. Mientras cu segun Wever, internamente no a delibera riba esaki, y no ta identifica nan mes cu e recomendacio di CAFT. 

PAPIA CU HULANDA

Segun Wever, kier papia riba e tema aki internamente prome cu e 4 landen overleg y prome cu e RMR e siman aki. “E poco cu CFT ta duna den su carta, no ta bay yuda nos pa pasa e tempo nos dilanti” Wever a sigui bisa. “Pero pa nos, esaki no ta e ultimo palabra. E ta simplemente un conseho y nos ta haciendo tur di nos parti pa por logra na e fondo cu nos mester pa por traspasa e periodo dificil aki” Wever a sigui bisa. 

NO TA CONTENTO CU CONSEHO

E mandatario su palabranan ta indica cu nan no ta contento cu e conseho y cu nan lo tin un discussion fuerte cu Hulanda riba esaki, sigur si Hulanda dicidi di sigui e conseho di CAFt, cu for di tempo cu e colegio a haya bida, ta e forma di opera di gobierno di Reino. A compronde cu gobierno tambe tabata sorpendi cu e carta cu noticiacla.com a publica cu e conseho, a sali afo, pasobra a compronde cu nan a purba wante paden, pa por discuti esaki internamente prome, manera cu Wever a confirma diamars anochi. 

SUMA CU ARUBA KIER

E suma cu gobierno a pidi Hulanda ta 1.3 biyon florin, di cual inicialmente a pidi pa 400 ta un ‘schenking’, esta un regalo. Pero rapidamente Hulanda a bisa cu esey no ta bay ta e caso y cualkier suma cu e duna Aruba, ta un fiansa. E suma sinembargo cu CAFt ta recomenda, no ta un suma cu Aruba a conta cu ne y lo bringa esaki sigur cu Hulanda den e dianan nos dilanti.