Knops: Aruba por haya ayudo pero esey no ta un donacion

DEN HAAG – Aruba y e otro islanan di Reino Hulandes den Caribe por conta riba ayudo, pero no pensa cu e ta un donacion. Esey ta pensamendo di gobierno Hulandes (lesa: minister di Asuntonan di Reino Raymond Knops). “ Nos lo no bandona e paisnan autonomo, pero esey ta diferente cu bisa, cu nos lo paga boso cuenta pa e proximo lunanan, pasobra esey claro no ta posibel” Knops a bisa diabierna despues di conseho di minister di Reino (RMR). Aruba a pidi Hulanda un ‘donacion’ di 400 miyon euro. “Ta placa di impuesto Hulandes” Knops a bisa. Como tal no por duna esaki como regalo, segun e mandatario Hulandes. 

VIDEO CONFERENCE

E mandatario Hulandes a referi tambe na e video call di diahuebs ultimo cu e tres prome ministernan di Aruba, Corsou y St Maarten. El a mustra cu na Europa, hopi pais ta den mesun situacion, tin debe halto y ta pidiendo paisnan manera Hulanda pa ayudo. “Claro cu nos kier yuda nan. Especialmente den un situacion agudo. Pero esey no ta incondicional. Esaki no ta posibel tampoco pasobra ta trata di placa di impuesto Hulandes”. “Aki na Hulanda tambe nos a pidi ciudadanoan pa haci sacrificio pa loke ta impuesto, y reduccion di gasto pa haci e escogencianan corecto. Pues esey tabata e mensahe cu mi a comparti ayera cu e ministernan di e tres paisnan ayera” Knops a bisa diabierna. “Nos lo acesora e peticionan pa ayudo. E lo funciona of no, e peticion ta razonabel of no. E ayudo ta bay mas leu cu placa” Knops a sigui bisa. “Ta trata tambe di conocemento riba tereno di salud, cu ta cuido y e provision di ayudo, pa cual el a keda solicita, riba tereno di defensa” e mandatario a finalisa bisando. No ta conoci ki dia ta dicidi ki tipo di ayudo ta haya. A dicidi si diabierna cu Aruba por haci uso di e articulo den ley di LAft pa Aruba desvia di e acuerdo y protocol.