Inversionistanan pa proyecto di hotel na San Nicolas a pasa screening

ORANJESTAD – E grupo di inversionista responsabel pa e proyecto hotelero grandi na San Nicolas, esta Three Rivers Real Estate NV, a pasa e screening di departamento di seguridad nacional di Aruba VDA. Asina NoticiaCla a compronde den fin di siman di su fuentenan fidedigno. E screening no a produci nada cu ta stroba e inversionistanan di continua cu nan plannan ambicioso pa traha e hotel proximamente. Ademas e portal aki a compronde cu diabierna ultimo gobierno di Aruba lo a manda un carta pa Banco Central informando nan di e resultado di e screening. Dialuna mainta den conferencia di prensa semanal di gobierno, minister Otmar Oduber confirma e noticia aki pa NoticiaCla, cu enberdad VDA a keda cla y cu e ta un screening positivo, y ademas e mandatario a confirma cu prome minister Wever diabierna a manda un carta pa Banco Central riba e tema. 

SIGUIENTE PASO

Cu e screening positivo, ta nifica cu segun criteria di seguridad nacional, tanto e compania como tur esnan envolvi den e compania Venezolano, lo no tin antecedentenan problematico cu lo stroba nan di continua cu nan plannan pues. Tambe e portal aki a compronde cu awor Banco Central lo mester otorga e permiso di divisa na e grupo di inversionista aki, pa asina nan por pasa e acto na notario. Cu e proceso aki, e portal aki a compronde cu e grupo aki lo por cuminsa cu construccion caba pa September di e aña aki. E grupo lo mester pone un bono di prestacion di 5.7 miyon dollar prome cu e hecho aki tuma lugar.

NOTICIA 

E portal aki a ‘break the news’ na comienso di februari di e aña aki di e grupo aki su intencion pa cu trahamento di un hotel di entre 300 pa 600 camber all inclusive na San Nicolas. E noticia aki a crea hopi sensacion, y te hasta tabatin instancia cu lo a purba duna esaki un tinte negativo, publicando cosnan negativo di e grupo aki. Algun dia despues, e dos ministernan responsabel pa turismo y infrastructura Otmar y Dangui Oduber a tene un conferencia di prensa pa informa mas riba e grupo aki y su intencion pa cu nos turismo. Dos luna despues, na april, gobierno a informa cu ‘ta normal cu ta screen tur compania prome cu nan haya permiso pa nan proyecto. Hasta a haya critica pa e carta cu a cay den publicidad cu Banco Central a manda pa tur instituto financiero local pa ‘nan tene cuenta cu e grupo aki’. E miedo tabata cu e grupo aki lo tabata liga na personanan no mucho positivo y cu nan metanan y fondo no tabata adkeri corectamente. Cu e screening positivo, esaki awor ta parse di ta cay na awa y awor e grupo aki por continua cu nan plannan. NoticiaCla a tuma contacto cu representantenan di gobierno riba e tema aki pero no tabata exitoso ainda.