Gobierno a pidi pa screen e inversionistanan pa hotel

ORANJESTAD –  Gobierno a pidi pa haci screening di e inversionistanan pa hotel di San Nicolas. Asina NoticiaCla a haya confirma pa Prome Minister Evelyn Wever diamars mainta. Esaki riba e pregunta riba e carta cu a cay den prensa di Banco Central riba e inversionistanan di e proyecto hotelero na San Nicolas. E carta en cuestion ta pidi institutonan financiero pa trata e inversionistanan di e proyecto hotelero na San Nicolas (Baby Beach Resort) cu cautela.  

E CARTA 

Ta trata di e carta en cuestion fecha 19 di maart 2019 di e instituto financiero supervisor (Banco Central di Aruba), cu ta pidi gerencia di banconan commercial na Aruba pa tene cautela ora cu ta trata e inversionistanan menciona (Three Rivers Real Estate NV). “Ta pidi tur banco pa aplica cautela maximo si pidi nan pa facilita servicio y of pago pa e entidad menciona, su directornan y accionistanan”, e carta ta bisa den e prome alinea. Despues e carta ta referi na e articulo di ley cu ta delinea labamento di placa y financiamento di terorismo, indicando tambe cu e banco(nan) tin cu haci nan trabou di investiga e companianan e cuestion, si un transaccion cu un cliente, ta encera un risico halto di labamento di placa of financiamento di terorismo. E no ta bisa cu tanto palabra cu e compania en cuestion, ta envolvi den esaki, pero ta papia den e direccion ey. 

REACCION GOBIERNO

Den  un reaccion breve diamars mainta, prome minister Evelyn Wever a duna NoticiaCla e siguiente contesta. “ Gobierno a tuma nota di un carta interno, fecha 19 di maart, 2019, entre Banco Central y banconan comercial na Aruba. Na e momento aki e screening usual ta tumando lugar riba peticion di gobierno di Aruba, manera ta e caso den projectonan di inversionnan grandi. Esaki tur den cuadro di e proceso inicia pa cu otorgamento di un permiso di divisa”. Pa mas claridad, Wever a sigui bisa cu e screening ta riba e compania y e inversionistanan en cuestion. “Esey ta standaard procedure den nos gobierno. No mas cu usualmente e cosnan aki no ta sali den publicidad”. Y ora cu papia di screening, esaki ta tuma lugar door di mas instancia cu solamente BCA, y ta envolvi e.o. tambe Veiligheids Dienst Aruba (VDA).

COMPANIA DUDOSO

For di momento cu NoticiaCla a publica e noticia di e hotel aki, a cuminsa specula riba ken ta e desaroyadornan di e proyecto, kico nan ‘backround’ ta, etc etc. Den un rato a sali cla cu ta trata di un compania Venezolano, cu inversionistanan cu tin placa suficiente y cu contrario na otro proyectonan hotelero cu tin cu bay subi mercado financiero en busca di placa, esaki tin tur cos cla caba. Tabata minister di infrastructura Otmar Oduber cu a bisa, cu segun cu e ta corda, esaki ta un di e prome companianan cu ta cla delanta cu su parti financiero, compara cu otro inversionistanan. Y cu ta cuestion di tempo prome cu tur documento keda cla. Despues a anuncia  cu e compania/inversionistanan a keda cla cu tur papeleo, y cu dentro di poco, por pone e toke final pa e compania por cuminsa construi e hotel di  entre 600 pa 900 camber, all-inclusive, na San Nicolas. 

INVERSIONISTA DUDOSO

Despues a cuminsa sali informacionan no confirma pero si den direccion di e inversionistanan menciona, cu lo ta trata aki di hendenan ‘obscuro’ VEnezolano cu lo kier saca e placa for di Venezuela y inverti esaki na Aruba den forma di un hotel, y asina ‘laba’ placa di un forma pa por sigui cu negoshinan obscuro. Nada di esaki sinembargo a keda confirma, pero awor cu e carta cu a lek di Banco Central, esaki por bira un asunto fastioso sigur pa gobierno, cu a profila cu e proyecto aki, como un logro pa reviva San Nicolas.