Baby Beach Resort ta bin na sitio reserva pa Bahia Principe

Posted on 02/8/2019 10:15 am AST | Updated on 02/8/2019 10:15 am AST

SEROE COLORADO – E hotel di 900 camber, Baby Beach Resort lo wordo construi na e sitio exacto cu tabata ‘reserva’ pa un otro proyecto hotelero grandi anuncia anteriormente esta Bahia Principe. Asina informantenan fededigno a confirma pa NoticiaCla. E publicacion di ayera di NoticiaCla riba e tema a crea basta conmocion den comunidad. E pregunta principal tabata ‘ken ta e desaroyador’. Riba esaki, a compronde cu ta hendenan ‘local’ cu ta Three Rivers Real Estate, aunke cu nan ta cay bou di e capa di CenterPoint Real Estate. Pa loke ta e operador, esaki lo ta den man di Apple Vacation. NoticiaCla a compronde cu gobierno dialuna awor lo suministra mas informacion riba e tema aki. 

E PROYECTO

Manera cu NoticiaCla a informa diahuebs atardi, si tur cos ta bon, aki 6 luna construccion lo cuminsa di un proyecto hotelero  di 900 camber (600 all inclusive y 300 Transient) na Seroe Colorado na altura di Baby Beach. Fuentenan cerca di e proyecto cu a papia cu NoticiaCla a base di anonimidad a confirma e informacion pa NoticiaCla, y a splica cu te hasta e financiamento completo pa e proyecto ta cla caba. E proceso ta hopi avansa y dentro di poco, por tende mas di e proyecto aki. For di parti di gobierno, nan no kier a bisa mucho cos pero no a desmenti e informacion tampoco. 

BABY BEACH RESORT 

E proyecto, cu lo opera  bou di e nomber di Baby Beach Resorts, lo conta cu dos fase, di cual e prome ta costa 60 miyon dollar cu ta inclui 600 camber all inclusive, restaurant y casino. E lo ta ubica riba un tereno di 105.000 m2, y e tereno aki ta cla caba, pues no ta cuestion di a duna e compania (Three Rivers Real Estate NV) un opcion. Den e caso aki e parti ey ta cla caba, aunke tin cu finalisa cierto documentacion. A compronde cu dentro di poco lo sali bin afo cu e detayes, y finalisa tur documentacion cu ta necesario. Por compronde tambe cu e localidad lo por ta esun cu tabata destina pa e proyecto anterior di Bahia, pero cu nunca no a sigui debi cu e proyecto di reapertura di refineria a continua. 

BAHIA PRINCIPETabata na October di 2014 cu e gobierno di e tempo ey a firma un MoU na San Nicolas cu e doño Pablo Pinjero pa construi un proyecto hotelero all inclusive di 900 camber ora cu e ta completo cu mester a bira Bahia Principe y ubica na Seroe Colorado, mas sigur cerca di Baby Beach. E mester a bira prome 350 camber den e prome fase, 550 den e di dos fase y e fase final lo mester a bira total 800 pa 900 camber. Despues a bin tardansa debi na e proyecto di reapertura di refineria y unda cu Bahia Principe a pone un ultimatum. Finalmente e proyecto a cay na awa debi cu e proyecto di reapertura di refineria a bira official. Awe e mesun lugar aki ta haya otro proyecto, esta esun di Baby Beach Resort. 

  • Edificio nobo di utilidad na aeropuerto a yega su punto mas halto

    Edificio nobo di utilidad na aeropuerto a yega su punto mas halto

    ORANJESTAD – E edificio nobo di utilidad na aeropuerto a yega su punto mas halto y a celebra esaki cu e acostumbrado spantenbier diabierna ultimo. E minister encarga cu aeropuerto Dangui Oduber tabata presente pa e evento, y hunto cu e director saliente di aeropuerto James Fazio, a atende esaki cu invitadonan. E edificio ta parti di e proyecto miyonario di expansion di e aeropuerto, esta Gateway 2030. E ta un inversion di 500 miyon florin cu mester keda completa dentro di 5 aña. 

  • Aruba Airlines a inaugura su buelo pa Riohacha diabierna

    Aruba Airlines a inaugura su buelo pa Riohacha diabierna

    ORANJESTAD – Despues cu a haci estudionan necesario, Aruba Airlines a ‘inaugura’ su buelo pa Riohacha Colombia diabierna mainta, cu un grupo di prensa y algun pasahero. Segun operations manager Frank Arends, esaki ta bira un di e tres destinacionan cu Aruba Airlines kier bula pa Colombia. Fuera di Riohacha, tin pensa tambe pa bula Medellin y Baranquilla. A cuminsa cu Riohacha pasobra e ekipo (avion) ta cla y por a cuminsa mesora. E ta un ruta popular, conoci pa otro aeroliñanan manera Tiara Air cu a bula e ruta aki exitosamente pa 5 aña largo. E ta un destinacion cu ta conecta famia cu otro, comercialmente tambe y ta uno basta barata. Ta usando e avion tipo CRJ 200, cu 50 pasahero, y tin pensa di usa e mesun tipo di avion aki pa e otro destinacionan den Colombia. 

  • SADA: Gobierno a confirma cu tin placa aloca pa douaneronan

    SADA: Gobierno a confirma cu tin placa aloca pa douaneronan

    ORANJESTAD – Gobierno a confirma na sindicato di douanero (SADA) diabierna mainta, cu tin fondo aloca pa paga e asunto di structura di salario. Asina presidente di e sindicato, Eduard Maduro, a bisa Noticiacla.com diabierna atardi. Diabierna mainta e sindicato a reuni cu e trahadonan durante ora di trabou, como un tipo di accion. Esaki a haya atencion di e minister cu a reuni cu nan mesora y awor parce cu nan a sali for di e reunion den un forma positivo. 

  • KVK: Reunion cu Minister di Finanza riba reforma fiscal tabata fructifero

    KVK: Reunion cu Minister di Finanza riba reforma fiscal tabata fructifero

    ORANJESTAD – E reunion cu Minister di Finanza, Xiomara Maduro, diahuebs ultimo (22 di augustus 2019) riba reforma fiscal tabata fructifero. Asina e gremio comercial a bisa den un comunicado diabierna. Segun e gremio, e reunion tabata uno positivo, caminda tanto KvK como e Minister a discuti abiertamente riba e punto di impuesto, en particular e importancia pa laga BBO riba recibo y e consecuencianan cu esaki ta bin cu ne.

  • KvK a alerta minister di competencia inhusto di cierto distribuidor y comerciante

    KvK a alerta minister di competencia inhusto di cierto distribuidor y comerciante

    ORANJESTAD – Durante e reunion cu Camara di Comercio tabatin cu minister di Finanza Xiomara Maduro e siman aki, a probecha pa alerta e Minister riba e situacion di competencia inhusto di cierto distribuidor y comerciante den tienda ta confronta cu ne diariamente. Tin comerciante preocupa, cu tin negoshi ilegal, cu diariamente ta importa e productonan y ta capaz di pone prijs mas abou, pasobra nan no ta cumpli cu e rekisitonan, pa haci negoshi manera; registra e negoshi y paga impuesto. KvK ta sostene e empresarionan y hopi di nan ta kere den competencia, pasobra esaki ta hisa e calidad di e producto y servicio y di nan benta ta cumpli cu impuesto y e beneficionan social di empleado. Pero e comerciantenan ta haya cu esaki mester keda den un forma husto, caminda ta reina un ‘level playing field’. Un comerciante, cu ta cumpli cu ley, no por competi contra e negoshinan ilegal, cu no ta cumpli cu leynan di impuesto. Esaki ta resulta cu e gastonan pa mantene un negoshi ta mucho halto, anto KvK tin diferente opcion con pa combati esaki.

  • Presupuesto 2020 no ta keda cla pa entrega dia 1 di september awor

    Presupuesto 2020 no ta keda cla pa entrega dia 1 di september awor

    ORANJESTAD – Presupuesto 2020 lo no keda cla pa entrega dia 1 di september 2019 manera ley di comptabilidad ta prescribi. Prome Minister, Evelyn Wever, a confirma esaki diahuebs pa noticiacla.com. Di otro banda, Wever a bisa si, cu lo entrega algo pa e fecha ey, un idea di con e presupuesto lo ta. “Nos ta na e ultimo fase di prepara e begroting 2020. Nos no a cera e begroting ainda” Wever a bisa. Loke e kiermen cu esey, ta, pues yega na e surplus di 25 miyon cu tin cu yega otro aña conforme e normanan stipula cu CAFT. “Mi no ta kere nos ta cla 1 di september, pero dia 1 di september nos lo tin algo si pa entrega y mustra ki direccion nos ta bayendo”. 

  • Powered by SETAR