KLM cu buelo adicional pa Aruba na 2018

ORANJESTAD – E aerolinea nacional Hulandes Koninklijke Luchtvaart Maatschappij (KLM) a caba di anuncia cu pa gran mayoria di 2018, ta inclui un di shete buelo semanal. KLM ta un socio importante pa turismo di Aruba, ya cu ta percura pa e transporte di un gran cantidad di bishitante for di e mercado Europeo en general.

KLM ta inclui den su itinerario di buelo, un servicio nobo entre Amsterdam-Boneiro-Aruba-Amsterdam riba diamars, cual a cuminsa caba den luna di november y lo continua te cu zomer 2018. E buelo realiza cu un avion tipo A330-200, tin capacidad pa 268 pasahero. Pa Aruba, esaki ta nifica e potencial pa un crecemento adicional den e turistanan Europeo, atrabes di diferente conexion via Hulanda.

Te cu dia 30 di november 2017, estadistica ta mustra cu pa 2017, Aruba a ricibi un total di 83.027 turista 'stay-over' for di Europa, di cual 34.021 ta bishitante for di Hulanda. Ta bon pa remarca cu –pa 2017- Europa ta representa 8.6% di e mercado total di turista pa Aruba, y cu Hulanda ta representa 3.5% di esaki.