Tromp: Otro siman partido PDR ta topa KVK den corte

ORANJESTAD – Otro siman diamars (13 di juni) corte ta trata e asunto di partido PDR (Partido Democracia Real). Asina e miembro di partido Alonso Tromp a confirma pa NoticiaCla.com. “Nos di PDR cu Principio a entama e caso contra KvK (Camara di Comercio). Pasobra nan no kier reconoce y inscribi nos di PDR. Asabienda cu KvK tin tur statuto di PDR y POR den nan bestand” Tromp a bisa. “Andin tin di splica tambe pakico ela pidi KvK pa no reconoce nos bestuur nobo” Tromp a bisa. Bikker a reacciona breve bisando cu Tromp y su grupo chikito a confirma via documento entrega na corte cu nan no a aplica nunca pa ta miembro di PDR, pues ta imposibel cu nan por pretende di por bin asumi puesto den un organisacion den cual apenas nan a aparece un par di siman riba lista, pues e reunion cu nan a tene ta ilegal. E ta conseha nan bay lanta nan propio partido,” sr. Tromp a lanta Aliansa dus e sa e caminda”. Por lo demas e ta abstene di comentario ya cu e caso ta den Corte. E caso ta tuma lugar 8:30 am.

PROBLEMA NA DECEMBER

Ta for di momento cu Andin Bikker a uni su mes cu e partido nobo POR na december di aña pasa, e problemanan a cuminsa cu PDR. A surgi un division den e partido ora cu esnan simpatisando Alonso Tromp a manda informacion cu a disolve e partido. Pero Bikker a reacciona mesora e tempo ey na december bisando cu Partido Democracia Real (PDR) no a wordo desolvi y lo keda existi. Segun Bikker, PDR a ripara cu cierto grupo den e partidonan tradicional ta spanta cu e union di PDR y POR den e plataforma Forsa Nobo, y nan no a compronde of no kier compronde e protocol y nan ta plama informacion incorecto cu PDR lo a wordo desolvi.

PROBLEMANAN A CONTINUA NA JANUARI

E problema entre e (ex) lider di partido Andin Bikker (e ta bisa cu ainda e ta lider) a conoce un dimension nobo na januari di e aña aki ora cu riba 18 di januari ultimo, e grupo cu ta sostene Alonso Tromp a tene un reunion, y a manda un comunicado na nomber di Partido Democracia Real (PDR) informando cu pa medio di un asamblea (Algemene Leden Vergadering ALV), “miembronan di PDR a eligi por medio di votacion e Directiva nobo pa e siguiente dos añanan’. Cu esaki nan ta laga Andin Bikker afo di e partido.

REUNION ILLEGAL

Apenas algun ora despues cu e grupo den partido PDR cu ta sostene Alonso Tromp a tene un reunion y eligi un directiva nobo segun e grupo, Andin Bikker a reacciona for di Hulanda e tempo ey. "Un grupo di apenas cinco persona a purba hunto cu sr. Alonso Tromp den un reunion ilegal pa pretende cu nan lo a eligi un "directiva nobo" di Partido Democracia Real" Bikker a bisa. Como tal Bikker ta considera e reunion ey ilegal y pues no tin ningun validez. Segun Bikker, tin un diferencia hudiricamente cu por wordo resolvi dilanti mesa berde. Mes momento a pidi e grupo di persona cu lo a bay para banda di Tromp, pa recapacita y no cay den trampa di Tromp. 

BAY CORTE

Segun Bikker, e problema cu tin entre su persona y Tromp ta uno huridico, unda cu cada uno ta interpreta documentonan di un tal forma. "Si e (Tromp) ta kere cu e tin rason, e tin cu bay corte y busca su derecho, caminda pafo ta e solucion" Bikker a bisa. Awor pues, ta bay corte pa determina ken tin rason den e asunto aki.