Partido PDR a eligi Alonso Tromp como presidente

ORANJESTAD -  Mientras cu tin un disputa den e partido Democracia Real, e grupo cu ta sostene Alonso Tromp a tene un reunion diaranson anochi, y a manda un comunicado na nomber di Partido Democracia Real (PDR) informando cu pa medio di un asamblea (Algemene Leden Vergadering ALV) diaranson anochi, miembronan di PDR a eligi por medio di votacion e Directiva nobo pa e siguiente dos añanan. Cu esaki nan ta laga Andin Bikker afo di e partido. NoticiaCla.com a compronde cu e partido a mand'e un carta dia 16 di januari ultimo informando e cu segun statuto, Bikker ta afo momento cu ela uni cu partido nobo POR. Intencion ta pa e directiva nobo bay Camara di Comercio diahuebs mes y haci e cambionan necesario. Dado caso e cambionan no wordo acepta pa KVK, lo entama un caso sumario pa esaki. 

STATUTONAN

Segun statutonan cu NoticiaCla.com a pone su man ariba, den articulo 5, enciso 8.B ta poni e.o. cu miembrecia di e persona ta personal y ta termina momento cu entre otro e persona asocia cu un partido nobo of bira miembro di un otro partido. 

Pa loke ta e directiva, esaki ta consisti di e siguiente miembro nan:

Presidente:                Sr. Alonso Tromp

Vice-Presidente:       Sr. Angelo Roos

Secretaris:                 Sra. Lisette Gomes

Tesorero:                   Sr. Bernadino Stamper

Segundo Tesorero:  Sr. Richard Goeloe

DISPUTA DEN PARTIDO

Mientrastanto, reaccion cu NoticiaCla.com a haya ta mustra cu e otro grupo di PDR, ta disputa e accion di awe nochi y ta mustra cu e grupo cu a yama e reunion awe nochi, no a haci'e di un forma legal, y como tal ta disputa esaki.