Filiantreault: Posibel bancarota InselAir Aruba no ta afecta InselAir International

WILLEMSTAD – E posibel bancarota di InselAir Aruba diaranson, lo no tin efecto riba e servicio cu InselAir International BV ta dunando. Asina e CEO di e compania e Canades Gilles Filiatreault a bisa diamars pa medio di un comunicado. E ta referi na e varios medionan cu a reproduci e noticia di e portal aki, den forma di exclusividad unda cu e administrador di e compania de Cuba lo pidi pa revoca e proteccion di bancarota diaranson awor den Corte. E compania di Corsou tambe a referi na e relato aki di e portal aki. Segun Filiatreault , e dos aerolineanan aki no tin ningun vinculo financiero cu otro y ta dos entidad legal diferente, cada uno registra riba nan respectivo teritorio. Cu esaki, InselAir International ta distancia su mes for di InselAir Aruba.

PLAN DI STABILISACION

Segun Filiatreault, e plan di stabilisacion di Insel Air International BV ‘ ta den ehecucion y ta mustrando resultadonan hopi positivo den varios area, entre nan esun di ta na tempo’. E ta sigura cu nan ta riba un 90% di ta ‘na tempo’. E ta admiti cu nan no a ‘yega’ ainda unda cu nan mester ta, pero ‘ta solidificando e fundacion tur dia pa sigura un futuro sano y pa un conectividad di termino largo dentro di Caribe Hulandes’ Filiatreault a finalisa bisando den e comunicado.