Administrador lo pidi hues declara InselAir Aruba bancarota

ORANJESTAD – E administrador encarga cu InselAir Aruba ta bay pidi hues pa declara e aerolinea bancarota e siman aki. Informacion cu NoticiaCla tin, ta cu e administrador Jeanot de Cuba a manda un carta aden pa converti e surseance (van betaling) den faillissement. Hues lo scucha directiva di InselAir Aruba e siman aki y tuma su decision. Cu e acto aki, e administrador ta converti su pensamento (cu e portal aki a raporta algun siman atras caba) di ‘pull the plug’ for di e compania. E caso ta poni pa wordo trata diaranson atardi den Corte.

ULTIMATUM SINO TA PULL THE PLUG

Manera e portal aki a raporta algun siman atras den forma di primicia, si den dos siman, gerencia di InselAir Aruba no a presenta un plan di restructuracion of ‘restart’ pa e compania, e administrador apunta pa Corte, Jeannot de Cuba lo ‘pull the plug’ osea, sugeri Corte pa kita e proteccion di bancarota. Asina tabatin den e rapport di 8 pagina cu NoticiaCla.com tin den su poder. Cu esaki ta habri caminda pa corte declara e compania bancarota. Esaki contrario na e declaracion haci pa e director Stephan van Spaandonk na maart. E tempo ey el a bisa cu ‘a reuni cu empleadonan di e aerolinea na unda a duna e bon noticia di e veredicto (di proteccion di bancarota) y subsecuente continuacion di e plan di rescate, cu ya ta riba bon caminda. Awor ta resulta cu no tin ningun plan di rescate (ainda) segun de Cuba.

PROTECCION DI BANCAROTA

Tabata dia 7 di maart ultimo cu e compania a pidi proteccion di bancarota (surseance van betaling), pa proteha e compania contra un cantidad grandi di creditor. Den e rapport ta papia di un cantidad di 240 creditor, y un debe di entre 26 pa 37 miyon florin. Esaki ta exclui pago di 4 luna di salario pa e 86 trahado (413 mil pa luna na salario). Ora cu huez a duna e compania e proteccion aki, pues riba e mesun dia cu e decision di hues a cay, maneho di InselAir Aruba N.V. a reuni cu empleadonan di e aerolinea na unda a duna e bon noticia di e veredicto y subsecuente continuacion di e plan di rescate, cu ya ta riba bon caminda. “E crisis financiero, cu wordo causa door di e claim pendiente na Venezuela, ta uno cu positivamente nos lo recupera di dje.” Van Spaandonk a bisa e tempo ey. “ InselAir Aruba N.V. lo mester di tempo pa reactiva su flota y operacion pa asina sigui sanea e retonan financiero. Nos tin hopi confianza cu pronto tur esaki lo ta tras di lomba”, van Spaandonk a expresa e tempo ey. Pero manera ta resulta awor, nada di esaki no a tuma lugar.

D DAY PA INSELAIR ARUBA

Riba e mesun fecha di e veredicto na maart, huez a dicta cu pa dia 7 di juni mester bin bek y wak si ta extende y formaliza e proteccion di bancarota mas ainda of ta kita esaki. E portal aki a compronde cu mirando e situacion, for di e rapport ta mustra cu e administrador no ta dispuesto pa warda asina hopi y por haci un peticion te hasta prome cu e fecha menciona, pa revoca e proteccion. Esey tin consecuencia pa e aerolinea cu por nifica fin di dje tambe.