Ultimatum pa InselAir Aruba sino ta ’pull the plug’

ORANJESTAD – Si den proximo dos siman, gerencia di InselAir Aruba no presenta un plan di restructuracion of ‘restart’ pa e compania, e administrador apunta pa Corte, Jeannot de Cuba lo ‘pull the plug’ osea, sugeri Corte pa kita e proteccion di bancarota. Asina tin den e rapport di 8 pagina cu NoticiaCla.com tin den su poder. Cu esaki ta habri caminda pa corte declara e compania bancarota. Esaki contrario na e declaracion haci pa e director Stephan van Spaandonk na maart. E tempo ey el a bisa cu ‘a reuni cu empleadonan di e aerolinea na unda a duna e bon noticia di e veredicto (di proteccion di bancarota) y subsecuente continuacion di e plan di rescate, cu ya ta riba bon caminda. Awor ta resulta cu no tin ningun plan di rescate (ainda) segun de Cuba.

PROTECCION DI BANCAROTA

Tabata dia 7 di maart ultimo cu e compania a pidi proteccion di bancarota (surseance van betaling), pa proteha e compania contra un cantidad grandi di creditor. Den e rapport ta papia di un cantidad di 240 creditor, y un debe di entre 26 pa 37 miyon florin. Esaki ta exclui pago di 4 luna di salario pa e 86 trahado (413 mil pa luna na salario). Ora cu huez a duna e compania e proteccion aki, pues riba e mesun dia cu e decision di hues a cay, maneho di InselAir Aruba N.V. a reuni cu empleadonan di e aerolinea na unda a duna e bon noticia di e veredicto y subsecuente continuacion di e plan di rescate, cu ya ta riba bon caminda. “E crisis financiero, cu wordo causa door di e claim pendiente na Venezuela, ta uno cu positivamente nos lo recupera di dje.” Van Spaandonk a bisa e tempo ey. “ InselAir Aruba N.V. lo mester di tempo pa reactiva su flota y operacion pa asina sigui sanea e retonan financiero. Nos tin hopi confianza cu pronto tur esaki lo ta tras di lomba”, van Spaandonk a expresa e tempo ey. Pero manera ta resulta awor, nada di esaki no a tuma lugar.

D DAY PA INSELAIR ARUBA

Riba e mesun fecha di e veredicto na maart, huez a dicta cu pa dia 7 di juni mester bin bek y wak si ta extende y formaliza e proteccion di bancarota mas ainda of ta kita esaki. E portal aki a compronde cu mirando e situacion, for di e rapport ta mustra cu e administrador no ta dispuesto pa warda asina hopi y por haci un peticion te hasta prome cu e fecha menciona, pa revoca e proteccion. Esey tin consecuencia pa e aerolinea cu por nifica fin di dje tambe.

E SITUACION ACTUAL

For di e rapport cu de Cuba a entrega, ta mustra cu e compania ainda ta ‘na bida’, no a retira ningun di su 86 trahadornan, y ainda tin su licencia (AOC) vigente. Ademas e rappor ta ta mustra cu e 86 trahadornan (varios di nan a haya trabou otro caminda) no a haya salario paga desde 7 di maart tampoco. E debe di 37 miyon despues a keda restructura na 26 miyon florin. Tambe ta sali na cla cu e acuerdo cu e compania a cera cu DIMP ( departamento di belasting) no a wordo honra, esta cu e compania no a cumpli cu e palabracion haci pa haci pagonan na impuesto.

PLAN DI RESTRUCTURACION

For di e rapport por saca afor tambe cu mientras cu Corsou tin un plan di restructuracion y restart, no por saca afo si Aruba tambe ta parti di esaki y ni si parti di e fianza di 15 miyon dollar, tabata valido tambe pa Aruba. “No sa si Aruba ta parti di e plan di stabilisacion, y no sa si Aruba a haya placa di e fianza” e rapport ta sigui bisa. Y mirando cu de Cuba, segun su rapport, ta bisa cu e no a haya ningun rapport di restructuracion, e no ta dispuesto pa sigui duna mas tempo. “Si no presenta un plan dentro di un tempo previsible, lo sugeri pa revoca e surseance van betaling’ e rapport ta bisa. “E estado cu e ‘inboedel’ di InselAir Aruba ta aden, no ta deseable pa mantene e surseance van betaling”, e rapport ta finaliza bisando.