InselAir Aruba ta distancia su mes di speculacionnan

ORANJESTAD- InselAir Aruba ta distancia su mes di speculacionnan . Asina un comunicado cu e compania a manda ta bisa. Segun e compania recientemente den medionan di comunicacion, ta circulando editorialnan na unda ta specula posibel actonan corupto cu ta involucra InselAir Aruba. Den pasado caba, e portal aki a raporta caba cu InselAir a  desmenti esaki, pero e biaha aki e compania ta bin atrobe basa riba otro medionan cu lo ta treciendo noticianan aki. "InselAir Aruba ta tuma nota di e speculacionnan aki y categoricamente ta distancia su mes di cualkier di e rumor of speculacionnan aki cu no solamente ta atacha InselAir Aruba, sino tambe otro instancianan di aviacion den un forma inhusto". “Ningun di e speculacionnan aki ta berdad, tampoco nos a wordo informa di ningun rapport of investigacion semehante”, CEO di InselAir Aruba sr. Stephan van Spaandonk ta expresa. “No obstante e retonan cu nos ta enfrentando, orguyosamente nos por bisa cu e team di InselAir Aruba ta traha continuamente den forma etico y responsable”, van Spaandonk ta conclui.